Semeytany.kz – Мақаншы ауданының негізгі капиталына құйылған қаржы былтырғы 9 ай қорытындысында өткен жылдың сәйкес кезеңімен салыстырғанда 147,3%-ға артқанын әкім Дәурен Қойгельдин Өңірлік коммуникациялар қызметіндегі баспасөз мәслихатында мәлімдеді.
Ауданда бірқатар ірі жобалар жүріп жатыр: «Бақты» ауылында жүкті өңдеу және жинақтау бағытындағы көлік-логистикалық хабтың құрылысы басталды; «Di-Nur Company» ЖШС жалпы құны 7 млрд теңгені құрайтын май өндіру және құрама жем зауытын салып жатыр. Сонымен бірге «Qazaq Oil», «Royal Petrol» және «Лукойл» жанар-жағармай құю станцияларын іске қосуға дайындалуда. «Бақты – Аягөз» теміржолы мен «Бақты» өткізу пунктін жаңғырту жобалары өңірдің көлік әлеуетін өсіріп, экономикаға жаңа серпін бермек.
Құрылыс саласында да өсім бар: пайдалануға берілген тұрғын үй көлемі 7 379 шаршы метрге жетіп, бір жылда 323,3% ұлғайды. Әлеуметтік осал санаттағы азаматтарға баспана беру үшін 59 жеке үйдің (118 пәтер) құрылысы жүргізілуде.
Жол және инфрақұрылым бойынша 1 млрд 755 млн теңгеге 41 шақырым жол жөнделіп жатыр. Мақаншы – Көктерек – Қызылбұлақ бағытымен қатар Келдімұрат, Қаратұма, Бақты ауылдарының көшелерінде орташа жөндеу қолға алынған. Мақаншы ауылындағы Жеңіс саябағы мен Қабанбай батыр ескерткіші маңындағы демалыс аймақтары жаңартылып, көше жарығы орнатылды. Бұл жұмыстар ауданның келбетін жақсартып, тұрғындардың тұрмыс сапасын арттыруға бағытталған.
