Semeitany.kz — Үкімет отырысында Абай облысының 2025 жылғы қаңтар-қыркүйек айларындағы әлеуметтік-экономикалық даму қорытындылары таныстырылды. Аймақ көрсеткіштері жоспардан жоғары орындалып, инвестициялық белсенділік қарқынды артқан.
Жалпы өңірлік өнім көлемі есепті кезеңде 1,4 трлн теңгеге жетті. Нақты көлем индексі 104%-дан асып, ұлттық даму жоспары 103,6% деңгейінде орындалды. Салалар бойынша өсім бар: көлік – 123,5%, байланыс – 106,4%, ішкі сауда – 105,9%, ауыл шаруашылығы – 102,8%, өңдеу өнеркәсібі – 101,3%.
Тоғыз айда өңірге 364,1 млрд теңге инвестиция құйылды (НКИ – 103,1%). Инвестицияны ұлғайту мақсатында облыс 85 шетелдік инвестормен келіссөз жүргізді. Жыл басынан бері жүзеге асырылып жатқан жобалар саны 29-дан 97-ге дейін өсіп, олардың жиынтық құны 2,2 трлн теңгеден 3,2 трлн теңгеге жетті.
Облыс делегациясы Қытайда өткен «Үлкен Алтай» халықаралық субөңірлік ынтымақтастық конференциясында 20-дан астам іскерлік кездесу өткізіп, жалпы құны 1,5 млрд АҚШ долларын құрайтын 15 меморандумға қол қойды. Қазір аймақ аумағында шетелдік капиталдың қатысуымен 713,7 млрд теңгенің 11 жобасы жүріп жатыр, олар шамамен 3 мың жаңа жұмыс орнын ашуды көздейді.
Облыс басшылығы инфрақұрылымдық мәселелерді кезең-кезеңімен шешу жеке инвестиция тарту, құрылыс және тұрғын үйді пайдалануға беру қарқынын тұрақтандыруға ықпал ететінін атап өтті. Жыл қорытындысында негізгі әлеуметтік-экономикалық индикаторлар бойынша өсім қамтамасыз етілмек.
