Semeytany.kz — Семей қаласының солтүстік-шығысындағы жаңа «Semey Smart City» ықшам ауданында 5 мың адамға арналған мешіттің құрылысы басталды. Нысан қоғамдық қордың қаржысы есебінен салынуда, аяқталуы 2028 жылға жоспарланған.
Аймақ басшысының айтуынша, бұл ғибадат орны облыс аумағындағы ең ірі мешіт болады. «Архитектуралық сәулеті келіскен, Алаштың рухани астанасына қажетті ауқымды жоба. «Абайға құрмет» акциясы аясындағы алғашқы үлкен бастама», – деді облыс әкімі.
Жоба сипаттамасына сай, мешітте бір мезетте 5 мың адам құлшылық ете алады. Нысанның сәулеттік келбеті ерекше болып, үлкен қатымхана да қарастырылған.
«Semey Smart City» ауданында жалпы 75 мың тұрғынға лайық заманауи тұрғын үй кешендері, 40-тан аса әкімшілік, коммерциялық және әлеуметтік нысан, сондай-ақ саябақтар мен демалыс аймақтары салынады.
Мемлекет басшысы Қасым-Жомарт Тоқаевтың қолдауымен басталған «Абайға құрмет» акциясы аясында еліміздің бірқатар өңірі Семейде әлеуметтік және мәдени инфрақұрылым нысандарын салуды жоспарлап отыр. Атап айтқанда, Маңғыстау облысы – Достық үйі, Шымкент – шығармашылық орталық, Түркістан облысы – көрме орталығы, Астана – «Келешек» мектебі, Ақтөбе облысы – жекпе-жек орталығы, Павлодар облысы – үстел теннисі орталығы, Солтүстік Қазақстан облысы – рәміздер алаңы, Қызылорда облысы – «Анаға тағзым» орталығы, Батыс Қазақстан облысы – желілік саябақ, Атырау облысы – «Абай әлемі» орталығын ұсынды. Сонымен қатар облыс әкімдігі мен «Самұрық-Қазына» қорының әріптестігімен қалада дене шынықтыру-сауықтыру кешенінің құрылысы басталды.
