Semeytany.kz — Мақаншы ауданында төтенше жағдайлар қызметінің материалдық-техникалық базасы жаңартылды. Бұл жұмыс Абай облысы әкімдігі мен Төтенше жағдайлар департаментінің қолдауымен жүзеге асты.
Ауданның құтқару қызметіне АЦ-5-40 (43118) «КамАЗ» маркалы өрт сөндіру автокөлігі, HOLMATRO HCT5114ST авариялық-құтқару құралы және DJI MAVIC 3T ұшу аппараты берілді. Жаңа техника өртті жедел сөндіруге, қиын жағдайда қалып қойған азаматтарды құтқаруға және жағдайды әуеден бақылап, алдын алу шараларын сапалы ұйымдастыруға мүмкіндік береді.
Шара барысында Мақаншы ауданының әкімі Дәурен Қойгелдин Төтенше жағдайлар бөлімінің және №18 өрт сөндіру бөлімінің жеке құрамын Төтенше жағдайлар министрлігінің 30 жылдығымен және Республика күнімен құттықтап, қызмет сапасын одан әрі арттыруға тілектестік білдірді.
Жаңартылған база төтенше жағдайлардың алдын алу мен салдарын жою бағытындағы жұмыстың тиімділігін күшейтіп, тұрғындардың қауіпсіздігін қамтамасыз етуге серпін береді.
