Semeytany.kz – Астанадағы Жақсылық Үшкемпіров атындағы Жекпе-жек сарайында қазақ күресінен XIV республикалық «Qazaqstan Barysy – 2025» турнирі аяқталды. Жарыста «Найман» лақап атымен танылған Марат Байқамұров топ жарып, бас жүлдені еншіледі.
Биыл бозкілемге 17 облыс пен үш мегаполистің үздіктері қосылған 43 балуан шықты. Солардың ішінен 106 келі салмақта күрескен Байқамұров қарсыластарының бәрін жарып өтіп, алтын белбеу, «Тайтұяқ» және 15 млн теңгенің сертификатын алды. Жүлдені ҚР Туризм және спорт министрі Ербол Мырзабосынов табыстады.
Жеңістен кейін Марат Байқамұров «Бұл жеңісімді әкеме арнаймын. Үшінші рет келіп, армандаған «Тайтұяққа» қол жеткіздім. Сенім білдірген жанкүйерлерге алғыс», – деді.
Күміс белбеу мен 3,3 млн теңге былтырғы чемпион, 151 келідегі Ерасыл Қажыбаевқа («Қажыбай») бұйырды. Қола белбеу мен 1,08 млн теңгені Маңғыстау облысының балуаны, «Қара бура» Нұрдәулет Жарылғапов иеленді.
