Semeytany.kz – Облыс орталығындағы «Арена» спорт кешенінде 14–21 қазан аралығында өткен бокстан Қазақстан чемпионатының финалдық кездесулері өтуде. Биыл жүлделер алғаш рет World Boxing ұйымы бекіткен жаңа салмақ дәрежелері бойынша сарапқа салынды.
Жарысқа еліміздің барлық өңірінен келген 400-ге жуық спортшы қатысты. Күндізгі бөлім қорытындысында өз салмақтарында Әйгерім Сәттібаева, Даниял Сәбит, Сәкен Бибосынов, Элина Базарова, Серік Теміржанов, Римма Волосенко, Абылайхан Жүсіпов, Бақыт Сейдіш, Ерасыл Жақпеков, Валентина Хальзова, Сағындық Тоғамбай, Нұрлан Сапарбай жеңімпаз атанды. Қалған салмақтар бойынша чемпиондар кешкі сессияда белгілі болады.
Чемпион атанған спортшылар алдағы халықаралық және әлемдік жарыстарға қатысатын Қазақстан ұлттық құрамасының сапына іріктеледі. Финалдық жекпе-жектерді Абай облысының әкімі Берік Уәли тамашалап, жеңімпаздар мен жүлдегерлерді марапаттады.
80 келіде топ жарған Ерасыл Жақпеков – Абай облысының тумасы. Ол 2024 жылы Астанадағы U-22 Азия чемпионатында алтын алып, Тайландтағы Азия біріншілігінде қола еншілеген. Биыл Нидерландтағы «Eindhoven Box Cup» турнирінде алтын, Болгариядағы беделді «Странджа» сайысында күміс иеленді. Жерлестеріміздің биылғы нәтижесі де жоғары: Шри-Ланкада өткен жастар арасындағы Азия чемпионатында Жанель Имантаева мен Ақнұр Тұрсынғали жеңімпаз атанды.
2025 жылы Абай облысынан 451 спортшы ұлттық құрамаға енді. Жыл басынан бері өңір спортшылары республикалық жарыстарда 1232 (376 алтын, 337 күміс, 519 қола), халықаралық сындарда 182 (56 алтын, 51 күміс, 75 қола) медаль жеңіп алды.
