Semeytany.kz — Облыс әкімі Берік Уәли Семейдегі «Юность» шағын ауданында салынып жатқан заманауи қоғамдық кеңістіктің құрылыс барысын көріп, мердігерлерге жұмысты сапалы әрі уақтылы аяқтауды тапсырды.
Жобаның ұзындығы 1 шақырымнан асады, аумағы 52 620 шаршы метр. Көгалдандыру жоспарына 355 қылқан жапырақты, 788 жапырақты ағаш, 8 484 сәндік бұта және 27 408 көпжылдық гүл енген. Аумаққа кіші сәулет нысандары, орындықтар, қоқыс жәшіктері, жарық бағандары орнатылады. Футбол, баскетбол, workout және балалар ойын алаңдары, демалыс аймақтары мен жасыл желекті үздіксіз сумен қамтитын резервуар қарастырылған.
Аймақ басшысы көктемде су шайып, батпаққа айналған бұл аумақтың қазір жаңа кейіпке енгенін атап өтті. Бірінші кезеңі аяқталуға жақын, екінші кезеңі келесі көктемде басталады. Тұрғындар да құрылыстың сапасына ризашылық білдіріп отыр. «Бұрын бұл жер батпақ болатын. Қазір жұмыс күнде жүріп жатыр, нәтижесі көз қуантады», – деді «Юность» тұрғыны Асылбек Әлімбай.
Семейде қоғамдық кеңістіктер желісі кеңейіп келеді: жуырда Республика күніне орай Қарағайлы ықшам ауданында шамамен 53 мың шаршы метрлік жаңа саябақ ашылып, мыңға жуық қарағай мен шырша, 9 500-ден астам бұта, 8 000-ға жуық көпжылдық гүл егілді. Онда серуен жолдары, демалыс аймақтары, сахна және ашық алаңдар толық абаттандырылған.
