Semeytany.kz — Абай облысында өткен кеңейтілген аппараттық кеңесте жастар саясатын іске асыру және бұқаралық спортты дамыту бағытындағы жұмыс талқыланды. Жиынға облыс әкімі Берік Уәли төрағалық етті.
Жастар саясаты мәселелері жөніндегі басқарма басшысы Олжас Бейсенбаевтың мәліметінше, өңірде 150 мыңнан астам жас бар, олардың үштен екісі қалада тұрады. Жоғары оқу орындарында 20 мыңнан аса студент оқиды. Биыл 7 мыңнан астам жас тұрақты жұмысқа орналасқан. «Бастау Бизнес» жобасы аясында 61 жас кәсіпкер 400 АЕК көлемінде грант иеленді. Облыста 10-нан астам жастар ұйымы жұмыс істейді, оның екеуі республикалық деңгейде. Жастар денсаулығын қорғауға арналған 4 орталық қызмет көрсетеді. «Жасыл ел» жобасы бойынша 1000 жас маусымдық жұмысқа тартылған. 2024 жылы «Абай жастары» және «Қозы Көрпеш – Баян Сұлу» өңірлік бағдарламалары арқылы 70-ке жуық жас отбасы баспаналы болды.
Жастар ресурстық орталықтарының желісін күшейту мақсатында өңірде 13 орталық жұмыс істейді. Дегенмен, кейбір аудандарда кадр тапшылығы мен материалдық базаның ескіруі байқалады. Осыған байланысты орталықтардың жабдықталуын жақсарту және қызметкерлер жалақысын көтеру жоспарланған. Аймақ басшысы жауапты орынбасар Мейірлан Раханов пен басқарма басшысы Олжас Бейсенбаевқа жастардың өзге өңірлерге көшу себептерін талдау, тұрғын үймен қамту тетіктерін әзірлеу, шалғай ауыл жастары үшін ресурстық орталықтардың қолжетімділігін арттыру, суицид, наркомания және лудоманияның алдын алу шараларын күшейту жөнінде тапсырма берді. «Мемлекет басшысы жастар саясатына ерекше көңіл бөледі. 2025 жылғы 23 сәуірде Жастар саясаты мәселелері жөніндегі басқарманы құру туралы шешім қабылдадық. Мұндай құрылым еліміздің 20 өңірінің тек 8-інде бар. Мақсат — жастардың идеясы мен бастамаларын қолдап, оларды қоғамдық өмірдің алғы шебіне шығару», — деді Берік Уәли.
Дене шынықтыру және спорт басқармасы басшысының м.а. Бақыт Бекбосыновтың баяндауынша, өңірде спорттың 72 түрі дамып келеді. 26 спорт мекемесінде 14 700-ден астам спортшы жаттығады, 451 спортшы ұлттық құрама сапында. 2025 жылы абайлық спортшылар республикалық және халықаралық жарыстарда 1590 медаль жеңіп алған. Облыс әкімі бұқаралық спортты дамытудың жаңа форматын әзірлеуді, инклюзивті спортты күшейту бойынша әлеуметтік салаға жауапты басқармамен бірлескен жоспар дайындауды тапсырды. «Жалған есеп беруден арылып, нақты көрсеткіштерге қол жеткізуіміз керек. Әсіресе олимпиадалық спорт түрлеріне басымдық беріп, білікті жаттықтырушы тарту және олардың еңбегіне лайықты жағдай жасау маңызды», — деп түйіндеді өңір басшысы.
