Semeytany.kz – Алматы қаласында өткен халықаралық FAIO 2025 (Fizmat AI Olympiad) байқауында Абай облысының Білім-инновация лицейінің командасы жалпыкомандалық есепте ІІ орынға лайық деп танылды.
Жүлдегерлер қатарында 10-сынып оқушылары Темірлан Жүнүсов пен Асанәлі Микебаев, 11-сынып оқушысы Әлем Аменов бар. Финал жеңімпаздары 31 қазанда салтанатты түрде марапатталды.
FAIO – жасанды интеллект бағытына арналған ең ірі халықаралық командалық олимпиадалардың бірі. Биылғы жарысқа Қазақстан, Ресей, Болгария, Грузия, Қырғызстан, Өзбекстан, Армения, Тәжікстан және Кипрден 400-ден аса команда (шамамен 1200 қатысушы) жиналды.
Олимпиада тапсырмалары бағдарламалау, алгоритм құрастыру және машиналық оқыту элементтерін қамтыды. Бұл оқушылардың логикалық, сыни ойлау қабілетін және командалық жұмыстағы үйлесімін сынға салды.
Абай облысы командасының бұл жетістігі өңірде IT және цифрлық технологияларға басымдық беріліп отырғанын тағы бір дәлелдеді.
