Semeytany.kz — Облыс әкімі Берік Уәли белгілі археолог, тарих ғылымдарының докторы Зейнолла Самашевпен кездесті. Зерттеуші Ақсуат ауданындағы Елеке сазы қорымында анықталған көне түрік дәуіріне тән мәдени кешеннен табылған құнды жәдігерлерді таныстырып, алдағы ғылыми жоспарларымен бөлісті.
Кездесуде Зейнолла Самашев Елеке сазындағы көне түрік қағанына арналған культтік-мемориалдық кешеннің тарихи және мәдени маңызын атап өтті. Оның айтуынша, ескерткіш құрылымы мен олжалары көне түрік қағанатының мемлекеттік жүйесі мен рухани дүниетанымын нақты сипаттайды. Археологиялық қазбалар 2019 жылдан бері жүргізіліп келеді, осы уақыт ішінде алтын, күміс, темір, сүйектен жасалған бұйымдар және салтанатты ғұрыптарға қатысты қалдықтар табылған.
Ғалым өңір басшысына қазба жұмыстарын жалғастыруды, сондай-ақ Елеке сазынан табылған жәдігерлерді көпшілікке кеңінен таныстыру мақсатында Семей қаласында арнайы көрме ұйымдастыруды ұсынды.
Берік Уәли археологиялық мұраны сақтау мен насихаттаудың маңызын атап өтіп, бастамаларға тиісті қолдау көрсетілетінін жеткізді. Қазіргі уақытта жобаны институционалдық түрде қолдау тетіктері пысықталып, Елеке сазы кешенін ғылыми-зерттеу және мәдени туризм бағытында жүйелі түрде дамыту мәселесі қарастырылмақ.
