Semeytany.kz – Бородулиха ауданының Новопокровка ауылында керамикалық кірпіш өндіретін жаңа зауыт іске қосылды. Ашылу рәсіміне облыс әкімі Берік Уәли қатысып, жобаның өңір экономикасына қосатын үлесін атап өтті.
Аймақ басшысы өз сөзінде елімізде инфрақұрылым мен өндіріс өрісін кеңейтуге бағытталған реформалардың өңірлік жобалар арқылы нақты нәтиже беріп жатқанын айтты. Жобаның құны – 2 млрд теңге. Кәсіпорын жылына 6 млн дана кірпіш шығарады. Қазірдің өзінде 65 адам еңбек етуде, 50-і тұрақты жұмыспен қамтылады. Семей қаласында салынатын жаңа құрылыстарға да бұл зауыттың өнімдері пайдаланылмақ.
Нысан туралы мәлімет: «Шыңғыс Тас» ЖШС жетекшісі Қайырлы Хасеновтің айтуынша, технологиялық процесс толық автоматтандырылған. Өндіріс сазды өндіруден бастап, кептіру мен күйдіруге дейінгі кезеңдердің бәрін қамтиды. Энергия тиімділігі сақталып, табиғи ресурстар ұтымды пайдаланылады. Өнім ұлттық стандарттарға сай – беріктігі жоғары, аязға төзімді.
Қазіргі жағдай: жоба 2024 жылдың сәуірінде басталып, 2025 жылдың қазанында толық аяқталды. Құрылыс-монтаждау және іске қосу жұмыстары бітіп, жабдықтар сынақтан өтті. Бір миллионнан астам кірпіш шығарылды. Көпқабатты үйлер мен мәдениет үйлерінің құрылысына қатысты келіссөздер жүріп жатыр, Шығыс Қазақстан облысынан да сұраныс бар. Биыл өңірде жалпы құны 7,3 млрд теңге болатын алты инвестициялық жоба жүзеге асырылып, 100-ден астам жұмыс орны ашылды. Жыл соңына дейін 18,6 млрд теңгенің тағы сегіз жобасын іске қосу жоспарда, олар 271 жаңа жұмыс орнын құрайды.
