Semeytany.kz — Мақаншы ауданының Келдімұрат ауылында заманауи талаптарға сай жаңа дәрігерлік амбулатория ашылды. Нысан «Ауылдық денсаулық сақтауды жаңғырту» ұлттық бағдарламасы аясында салынды.
Жоба шеңберінде аудан бойынша барлығы 8 амбулаториялық және фельдшерлік пункт бой көтерді. Келдімұраттағы жаңа амбулатория ауыл тұрғындарына алғашқы медициналық көмекті сапалы әрі қолжетімді етуге бағытталған.
Мекеме ішінде қабылдау, процедуралық және емшара кабинеттері, орта буын медицина қызметкерлеріне арналған бөлмелер, дәріханалық пункт қарастырылған. Ғимарат заманауи медициналық құрал-жабдықтармен қамтамасыз етілген: нейбулайзер, электрокардиограф, дефибриллятор, магнитотерапия аппараты, спирометр және жоғарғы тыныс жолдарын емдеуге арналған ультракүлгін құрылғылар орнатылған.
Жаңа амбулаторияның іске қосылуы ауыл тұрғындарының денсаулық қызметіне қолжетімділігін арттырып, алғашқы медициналық-санитарлық көмектің сапасын жақсартуға мүмкіндік береді.
