Semeytany.kz — Семей қаласындағы «Арена» спорт кешенінде ерлер мен әйелдер арасындағы Қазақстан Республикасының дзюдо чемпионаты басталды. Дода 10–13 қараша күндері өтіп, елдің барлық өңірінен келген 569 спортшы 14 салмақ дәрежесінде бақ сынайды.
Чемпионаттың ашылу салтанатына Абай облысының әкімі Берік Уәли, Қазақстан дзюдо федерациясының бас хатшысы Тимур Болат және 2024 жылғы Олимпиада ойындарының чемпионы Елдос Сметов қатысты. Аймақ басшысы құттықтау сөзінде Семейде осындай деңгейдегі жарыстың өтуі өңір спортының дамуына серпін беретінін айтып, қатысушыларға сәттілік тіледі. Елдос Сметов те ұйымдастырушыларға алғысын білдіріп, болашақта осы алаңнан талай мықтының шығатынына сенім артты.
Чемпионат кестесі бойынша жарыстар төрт күн бойы жалғасады. Қатысушылар жеке сайыстарда өз шеберлігін көрсетіп, жүлдеге таласады. Турнирдің ұйымдастырылуы мен қауіпсіздігі жергілікті спорт басқармасы және федерация тарапынан қамтамасыз етілген.
Абай облысында дзюдоға қызығушылық жоғары. Биыл Джакартада өткен жасөспірімдер арасындағы Азия чемпионатында жерлесіміз Фархат Зейнолла алтын, Аяжан Ринатқызы қола жүлде алған. Ақтөбеде өткен Қазақстан чемпионатында облыс құрамасы екі алтын, үш күміс, екі қола медальмен жалпыкомандалық есепте екінші орын иеленді.
Қазіргі таңда өңірде 26 спорт мекемесінде 14 мыңнан аса жас спортпен шұғылданады. 2025 жылы Абай облысының 451 спортшысы ұлттық құрама сапына енді. Жыл басынан бері спортшыларымыз республикалық деңгейде 1662, халықаралық жарыстарда 286 медаль иеленген. Облыста спорт инфрақұрылымын кеңейту мақсатында 20 нысанның құрылысы жүргізіліп жатыр.
