Semeytany.kz — Женевадағы Sotheby’s аукционында Наполеон Бонапартқа тиесілі болуы мүмкін бриллиантты түйреуіш 4,4 миллион долларға сатылды.
Әшекейде 13 караттан астам сопақша ірі бриллиант және оны қоршаған ұсақ тастар бар. Сарапшылар оның бастапқы құнын небәрі 251,4 мың доллар деп бағалаған, алайда сауда барысында лот болжанған бағадан он есе қымбатқа өтті.
Түйреуіш шамамен 1810 жылы Парижде жасалған. Кейін зергерлік бұйым Пруссия королі ІІІ Фридрих Вильгельмге өтіп, бірнеше ғасыр бойы Гогенцоллерндер әулетінің меншігінде сақталған. Соңғы жылдары әшекей жеке коллекцияның құрамында болған. Sotheby’s мәліметінше, түйреуіш Наполеон әскері шегінген кезде тастап кеткен заттарының арасынан табылған. Жаңа иесі өзін жарияламауды жөн көрген.
Аукционда назар аударған тағы бір бұйым – 32 караттан астам жасыл берилл. Ол Наполеонның 1804 жылғы таққа отыру салтанатында таққан тасы делінеді. Бұл асыл тас 1,1 миллион долларға сатылып, бастапқы бағасынан 17 есе қымбатқа бағаланды.
Сарапшылардың айтуынша, Наполеон дәуіріне қатысты мұндай жәдігерлерге қызығушылық жақында Лувр музейінде болған ұрлықтан кейін күшейген. 19 қазанда белгісіз адамдар Луврдың Аполлон галереясындағы патшалық зергерлік бұйымдарды қолды еткен. Олар жүк көлігіне орнатылған баспалдақ арқылы терезеден кіріп, екі сауытталған витринаны бұзып, тоғыз экспонатты ұрлап кеткен. Олардың қатарында Мария-Амелия мен Гортензия ханшайымдарға тиесілі бриллиант пен сапфирдан жасалған әшекейлер бар. Залал көлемі шамамен 102 миллион доллар деп бағалануда.
Кейінірек Луврдағы ұрлыққа байланысты екі күдіктінің ұсталғаны хабарланды. Француз билігінің мәліметінше, ер адамдар патшалық зергерлік бұйымдарды ұрлауға қатысқанын мойындаған.
