Semeytany.kz — Тәуелсіздік күні қарсаңында Абай облысы әкімінің қолдауымен жүзеге асып жатқан «Абай жолы» кітапханасы жобасы аясында жарық көрген кітаптар топтамасының тұсаукесері өтті. Шараны облыстық мәдениет, архивтер және құжаттама басқармасы ұйымдастырып, басқосуға кітап авторлары мен сала өкілдері қатысты.
Жаңа топтама Семей өңірінен шыққан ақын-жазушылардың, өнер адамдарының еңбектерін әртүрлі жанрда қамтып, әдебиеттен бастап ғылыми зерттеулерге дейінгі ауқымды бағыттарды біріктірді. Авторлық еңбектерді бағалау және жариялау жөніндегі кеңеске Шәкәрім университетінің профессоры, Қазақстанның еңбек сіңірген қайраткері, «Парасат» орденінің иегері, «Абай облысының Құрметті азаматы» Еспенбетов Арап Сләмұлы жетекшілік етеді.
Биыл жоба аясында 19 автордың 25 кітабы жарық көрген. Жалпы таралымы – 12 500 дана. Ұлы Абайдың 180 жылдық мерейтойына орай Абай тақырыбына басымдық беріліп, оқырманға Мұхтар Әуезовтің «Абай жолы» роман-эпопеясы, Қайым Мұхамедхановтың «Абайдың ақын шәкірттері», «Абай мұрагерлері» зерттеу еңбектері, Кәмен Оразалиннің «Абай ауылына саяхат» деректі шығармасы, Мырзақасым Әсет Медеуханұлының «Абай елінің әңгімелері», Асан Омаровтың «Абай руханияты», Бауыржан Ердембековтің «Абай және әдеби орта» атты еңбектері ұсынылды.
Сондай-ақ 142 жылдық тарихы бар Абай кітапханасының сирек қорындағы өлкетанушы Николай Коншиннің өңірге қатысты құнды еңбектері мен Мұратбек Кенемолдиннің «Семей – Алаштың қаласы» атты зерттеулер мен мақалалар жинағы оқырман қауым үшін ерекше жаңалық ретінде аталды.
Топтама ішінде ақын, әнші Әсет Найманбайұлының, Абайдың ақындық мектебінің ірі өкілі Көкбай Жанатайұлының, жазба және суырып салма ақын Қалихан Алтынбаевтың әдеби мұралары да бар. Бұған қоса, өңірден шыққан ғалымдар Әбдеш Төлеубаевтың «Қазақтардың дәстүрлі наным-сенімдері», Светлана Смағұлованың «Қазақ даласындағы жұттар мен ашаршылықтар», Әбіл-Серік Әліәкбардың «Қалам құдіреті» атты ғылыми еңбектері жарық көрді. Қазақ поэзиясының інжу-маржанын топтастырған «Жыр жауһарлары» жинағының 3-кітабы да жарияланған.
Кітап таныстырылымында Медеу Сәрсеке, Қайым-мұнар Табеев, Тыныштықбек Әбдікәкімұлы, Әділғазы Қайырбеков, Қайырбек Шағыр сынды қаламгерлердің еңбектері де оқырманға жол тартқаны айтылды. Шара барысында кітаптардан жасақталған экспозиция қойылып, жасанды интеллект көмегімен жасалған электронды кітапхана қоры таныстырылды. Сонымен бірге театр әртістері кітап авторлары мен олардың шығармаларына қатысты әдеби-көркем қойылымдар ұсынды.
Айта кетейік, 2023–2027 жылдары жүзеге асырылатын «Абай жолы» кітапханасы жобасы аясында бүгінге дейін 61 атаулы кітап 30 500 данамен жарық көрген. Жоба бойынша 2023 жылы 16, 2024 жылы 20, ал биыл 25 атаулы кітап Астана қаласындағы «Фолиант» баспасынан басылып шыққан.
