Semeytany.kz — Облыс әкімі Берік Уәлидің төрағалығымен кеңейтілген аппараттық кеңес өтіп, 2025 жылдың әлеуметтік-экономикалық даму болжамы және бюджеттік құрылыс нысандарының сапасына жүргізілген мониторинг қорытындылары қаралды. Жиынға облыстық басқарма басшылары мен өңірлік департамент жетекшілері қатысып, аудан-қала әкімдері бейнережимде қосылды.
Күн тәртібіндегі мәселелер бойынша экономика және бюджеттік жоспарлау басқармасының басшысы Роза Құдайбергенқызы мен мемлекеттік сәулет-құрылыс бақылау басқармасының басшысы Сайлауғалы Байназаров баяндама жасады. 1 желтоқсандағы жағдай бойынша негізгі 9 көрсеткіштің 6-ы оң өсім көрсеткені айтылды. Өнеркәсіп, тау-кен саласы және тұрғын үйді пайдалануға беру бағыттарында жыл соңына дейін көрсеткішті жақсартуға мүмкіндік бар. Қазір жауапты басқармалар мен аудан-қала әкімдіктері қосымша резервтерді анықтап, оларды статистикалық есепке енгізу бойынша жұмыс жүргізіп жатыр.
Өнеркәсіп саласында 11 айдың қорытындысымен нақты көлем индексі 99,2 пайызды құраған. Жыл соңына дейін бұл көрсеткішті 100 пайыздан жоғары деңгейге көтеру көзделген. Өңдеу өнеркәсібінде өсім сақталып, 11 айда 102,8 пайызға жеткен. Инвестиция тарту, ауыл шаруашылығы және құрылыс салаларында да оң динамика бар. Ауыл шаруашылығы бойынша нақты көлем индексі 100,9 пайыз болып, жыл қорытындысында 103 пайыздан жоғары деңгейге жеткізу жоспарланып отыр.
Аймақ басшысы кәсіпкерлік және индустриялық-инновациялық даму, ауыл шаруашылығы, құрылыс, жолаушылар көлігі және автомобиль жолдары, цифрлық технологиялар басқармаларына аудан-қала әкімдерімен бірлесіп, инвестиция, өнеркәсіп, ауыл шаруашылығы, көлік және байланыс қызметтері бойынша жоспарланған көрсеткіштерді орындауға нақты шаралар қабылдауды тапсырды.
Мемлекеттік сәулет-құрылыс бақылау басқармасының мәліметінше, биыл барлық қаржы көздері есебінен құрылыс жұмыстарын бастауға 881 талон-хабарлама түскен. Соның 618 нысаны жыл соңына дейін пайдалануға қабылдануы тиіс: 190-ы бюджеттік, 93-і квазимемлекеттік секторға, 335-і жеке меншікке тиесілі. Бұдан бөлек, аудандарда Off-Take келісімшарты негізінде бір қабатты, 2 пәтерлі 315 тұрғын үй сатып алу жоспарланған, қазіргі таңда 223 үй сатып алынған.
Облыс әкімінің хаттамалық тапсырмасына және Ұлттық экономика министрінің бұйрығына сәйкес, қала-аудандардағы 142 бюджеттік нысанда құрылыс сапасына мониторинг жүргізілген. Мониторинг барысында кемшіліктер анықталған аудан-қала әкімдері мен тиісті басқарма басшылары жиында олқылықтарды жою бойынша атқарылатын жұмыстар туралы баяндады.
Жиын қорытындысында Берік Уәли салаға жауапты орынбасарларға салынып жатқан нысандардың сапасын және заңнама талаптарының сақталуын тұрақты бақылауда ұстауды, ал аудан әкімдері мен тиісті басқармаларға жыл соңына дейін жоспарланған құрылыс нысандарын уақытылы пайдалануға беруді қамтамасыз етуді міндеттеді. Аймақ басшысы инвестиция тарту мәселесі Президент пен Үкімет бақылауында екенін атап өтіп, өңірде бой көтеріп жатқан ғимараттардың сапасына ерекше мән беру қажеттігін айтты.
