Semeytany.kz — Бородулиха ауданының Камышенка ауылында республикалық «Ауыл – ел бесігі» бағдарламасы аясында 100 орындық ауылдық клуб пайдалануға берілді. Жаңа нысан ауыл тұрғындары үшін мәдени-әлеуметтік орталыққа айналып, жергілікті жұрттың бос уақытын тиімді ұйымдастыруға мүмкіндік бермек.
Камышенка — тірек елді мекендердің бірі. Мұнда қазір 957 адам тұрады. Клубтың іске қосылуымен 8 тұрғын тұрақты жұмыспен қамтылды. Ал ауыл балалары мен жасөспірімдері үшін шахмат, дойбы, тоғызқұмалақ үйірмелері, сондай-ақ домбыра мен түрлі музыкалық аспапта ойнауға баулитын сабақтар ашылатыны айтылды.
Салтанатты ашылу рәсіміне қатысқан облыс әкімі Берік Уәли бұл ғимараттың ауыл өмірі үшін айрықша маңызын атап өтті. Аймақ басшысының айтуынша, Камышенкада соңғы рет 1985 жылы мектеп салынған, содан бері бой көтерген алғашқы жаңа нысан — осы клуб. Ол құрылыс сапасына да оң баға беріп, мұнда алдағы уақытта түрлі шаралар, концерттер мен кездесулер өтетініне сенім білдірді.
Іс-шара барысында облыс әкімі мәдениет ошағына жаңа музыкалық аппарат алуға арналған сертификатты табыс етті. Ауыл тұрғындары да қуанышын жасырмады. Камышенкалық Дана Шабақпаева клубтың ашылуы ауылдың рухани өміріне серпін беретін ерекше оқиға екенін айтып, мәдениет үйі ішінде танымдық әрі тағылымды іс-шаралар жиі ұйымдастырылады деген үмітін жеткізді.
Сондай-ақ, Берік Уәли Новопокровка елді мекеніндегі жаңадан салынған 100 орындық ауылдық клубты да аралап көрді. Мұнда балаларға арналған шахмат, дойбы және қолөнер үйірмелерін ашу жоспарланған. Ал ересектер үшін «60 жастан асқан азаматтарға арналған қызығушылық клубы» жұмыс істемек.
Жалпы Бородулиха ауданында 33 мәдениет мекемесі бар. Оның ішінде бір аудандық және алты ауылдық мәдениет үйі, төрт ауылдық клуб, бір аудандық және 21 ауылдық кітапхана жұмыс істейді. Биыл өңірде бірқатар мәдени нысан жаңартылып, жөндеу жұмыстары жүргізілген: Қарауыл ауылындағы Мәдениет үйі, Абай атындағы облыстық әмбебап кітапхана, Абай атындағы театр және Семейдегі Ф.М.Достоевский атындағы әдеби-мемориалдық мұражайдың шатыры ағымдағы жөндеуден өтті. Ал Семейдегі облыстық тарихи-өлкетану музейінде күрделі жөндеу жалғасып жатыр.
2025 жылы мәдени инфрақұрылымды дамыту үшін республикалық бюджеттен жаңа нысандар құрылысына қаржы бөлініп отыр. Қазір «Ауыл – ел бесігі» бағдарламасы аясында Үржар ауданындағы Жоғарғы Егінсу ауылында 100 орындық клуб, сондай-ақ Бесқарағай ауданындағы Беген, Глуховка, Ерназар ауылдарында және Ақсуат ауданындағы Көкжыра ауылында мәдениет үйлерінің құрылысы жүргізілуде.
