Semeytany.kz — бүгін Семей қаласындағы «Ес-Аймақ» рухани орталығында облыстық этномәдени бірлестіктер мен қоғамдық институттар арасында өткен «Достық-2025» байқауының жеңімпаздарын марапаттау рәсімі өтті.
Салтанатты жиынға Абай облысының әкімі, өңірлік Қазақстан халқы Ассамблеясының төрағасы Берік Уәли, этномәдени бірлестіктердің өкілдері мен қоғамдық ұйым жетекшілері қатысты. Аймақ басшысы өз сөзінде бірлік пен татулықтың ел дамуы үшін айрықша маңызын атап өтіп, этносаралық келісімді нығайтуға үлес қосып жүрген ұйымдардың еңбегіне ризашылығын білдірді.
Аталған байқау азаматтық қоғамды жүйелі түрде жаңғырту, жалпыұлттық құндылықтарды дәріптеу және Қазақстан халқы Ассамблеясының 30 жылдығын қорытындылау мақсатында ұйымдастырылған. Ұйымдастырушылардың айтуынша, жоба өңірдегі қоғамдық бірлікті бекемдеп, түрлі этнос өкілдерінің мәдениеті мен дәстүріне құрметті арттыруды көздейді.
Шара барысында жеңімпаздар бірнеше номинация бойынша марапатталды. Атап айтқанда, қатысушылар «Рухани бірлік пен жалпыұлттық келісімді дамытуға қосқан үлесі үшін», «Азаматтық қоғамды дамытуға қосқан үлесі үшін», «Қоғамдағы татулық пен өзара құрметті нығайтуға қосқан үлесі үшін», «Мәдени мұра мен дәстүрді сақтауға қосқан үлесі үшін», «Рухани келісім мен ұрпақ сабақтастығының үлгісі» аталымдары аясында үздік деп танылды. Сонымен қатар бірқатар этномәдени бірлестіктер мен қоғамдық ұйым өкілдеріне Қазақстан халқы Ассамблеясының және облыс әкімінің Алғыс хаттары табысталды.
Айта кетейік, биыл елімізде Қазақстан халқы Ассамблеясының 30 жылдығы кең көлемде аталып өтуде. Кеш соңында көрермендерге Әміре Қашаубаев атындағы мемлекеттік филармонияның концерттік бағдарламасы ұсынылды.
