Semeytany.kz — Үржар ауданының орталығында 10 төсектік күндізгі стационары бар, бір мезетте 50 келушіге қызмет көрсетуге қауқарлы дәрігерлік амбулатория пайдалануға берілді. Нысанның ашылу рәсіміне облыс әкімі Берік Уәли қатысты.
Жаңа медициналық мекеме «Ауыл – ел бесігі» бағдарламасы аясында бой көтерген. Заманауи талаптарға сай жабдықталған амбулатория ауыл тұрғындарына алғашқы медициналық-санитарлық көмекті сапалы деңгейде ұсынуға бағытталған. Мұнда емделушілер күндізгі стационарда ем алып, дәрігердің бақылауынан өту мүмкіндігіне ие.
Салтанатты шарада аймақ басшысы тұрғындарды жаңа нысанның ашылуымен құттықтап, денсаулық сақтау саласын дамыту мемлекет саясатының басым бағыттарының бірі екенін айтты. Оның сөзінше, бүгінде Үржар ауданы тұрғындарына аудандық көпсалалы орталық ауруханамен қатар, 6 фельдшерлік-акушерлік пункт және 16 медициналық пункт қызмет көрсетіп отыр.
Сондай-ақ облыс әкімі Президент тапсырмаларын орындау аясында өңірде денсаулық сақтау инфрақұрылымын жаңғырту жұмыстары кезең-кезеңімен жүзеге асып жатқанын жеткізді. Атап айтқанда, Үржар ауданында бұл амбулаториядан бөлек «Ауылдық денсаулық сақтауды жаңғырту» ұлттық жобасы шеңберінде 7 елді мекенде медициналық нысандардың құрылысы аяқталған.
Жергілікті тұрғындар да жаңа ғимараттың ел игілігіне берілгеніне ризашылықтарын білдірді. Үржар ауылының тұрғыны Нұрланбек Сандыбаев медициналық нысанның сапалы салынғанын айтып, халыққа ұзақ жыл қызмет етуіне тілектестік танытты.
