Semeytany.kz – Шекара шебіндегі Мақаншы ауданының орталығында 27 жыл бойы аяқталмай тұрған үш қабатты ғимарат қайта жаңғыртылып, дәрігерлік амбулатория ретінде ел игілігіне берілді.
Бүгін нысанның ашылу рәсіміне облыс әкімі Берік Уәли қатысып, тұрғындарды жаңа медициналық мекеменің іске қосылуымен құттықтады. Аймақ басшысының айтуынша, көктемдегі жұмыс сапары кезінде қаржы бөлу жөнінде уәде беріліп, сол міндет орындалған. Сонымен бірге Мемлекет басшысының денсаулық сақтау инфрақұрылымын дамытуға қатысты тапсырмалары өңірде жүйелі іске асып жатқанын атап өтті.
Жаңа амбулаторияда 15 орындық күндізгі стационар бар. Мекеме бір ауысымда 100 адам қабылдай алады. Ғимарат ішінде зертханалық диагностика, әйелдер консультациясы, хирургия, стоматология және гинекология кабинеттері, сондай-ақ ем-шара бөлмесі, тіркеу орны, күту аймақтары және өзге де қажетті бөлмелер қарастырылған. Нысан еуропалық үлгідегі құрал-жабдықтармен жабдықталғаны айтылды.
Өңір басшысы Мақаншы ауданындағы аудандық аурухананың бас ғимараты 1976 жылдан бері күрделі жөндеу көрмегенін еске салып, бұл бағытта да нақты шешім қабылданғанын жеткізді. Қазір аурухана ғимаратына қатысты құрылыс жұмыстары жүріп жатыр, келесі жылы пайдалануға беру жоспарланған. Туристік әлеуеті бар шекаралық ауданның медициналық нысандарын жаңғырту алдағы уақытта да жалғасатыны мәлімделді.
Сондай-ақ «Ауылдық денсаулық сақтауды жаңғырту» ұлттық жобасы аясында Мақаншы ауданындағы 8 елді мекенде дәрігерлік амбулаториялар салынып, қолданысқа берілгені хабарланды. Жалпы облыс бойынша былтыр алғашқы медициналық-санитарлық көмек көрсететін 65 нысан салынған. Бұдан бөлек, арнайы мемлекеттік қордан 5,6 млрд теңге бөлініп, 3 әлеуметтік нысанның құрылысы жүріп жатыр. Биыл денсаулық сақтау саласының материалдық-техникалық базасын нығайтуға 6,9 млрд теңге бағытталған.
