Semeytany.kz — Абай облысының Мақаншы ауданына қарасты Қарабұлақ ауылында жаңа спорт модулі пайдалануға берілді. Ашылу салтанатына облыс әкімі Берік Уәли қатысып, нысанның ауыл тұрғындары үшін маңызына тоқталды.
Қарабұлақ ауылында бүгінде 1569 адам тұрады. Елді мекендегі 230 оқушы спортпен шұғылданады. Ауылда қазақ күресі, аударыспақ секілді ұлттық спорт түрлерімен айналысатындар бар, сондай-ақ шағын футбол алаңы мен күрес мектебінің филиалы жұмыс істейді. Соңғы жылдары дзюдодан аудандық, облыстық жарыстарда жүлде алған спортшылар саны көбейген. Волейбол және футбол командалары да аудан деңгейінде жүлделі орындардан көрініп жүр. Ат спортынан Қарабұлақ командасы аудан намысын қорғап келеді. Сонымен қатар ауыл спортшылары жеңіл атлетика, қол күрестіру және гір көтеруден де аудан чемпиондары атанған.
Жаңа модуль – бір қабатты ғимарат. Мұнда көлемі 800 шаршы метр болатын кең ойын залы орналасқан, нысан бір мезгілде 120 адамды қабылдай алады. Құрылыс жұмыстары биылғы жылдың екінші тоқсанында басталып, төртінші тоқсанында аяқталған. Жоба жеке инвестор есебінен оффтейк келісім негізінде жүзеге асырылғаны айтылды.
Салтанатты шарада сөз сөйлеген облыс әкімі спорт инфрақұрылымын дамыту – бұқаралық спортты кеңейтіп, халық денсаулығын нығайтудың маңызды тетігі екенін атап өтті. Аймақ басшысының айтуынша, Қарабұлаққа биыл бірнеше әлеуметтік нысан бойынша қолдау көрсетіліп, тұрғындардың сұранысы ескерілген.
Ауыл тұрғындары да жаңа ғимараттың ашылуын үлкен қуанышпен қабылдады. Спорт ардагері Айт Қорғанбаев ауылда ұзақ жылдар бойы жаңа нысан салынбағанын айтып, биыл дәрігерлік амбулатория, көпбалалы отбасыларға тұрғын үй және спорт модулінің қатар іске қосылғанын ауыл жастары үшін маңызды демеу деп бағалады.
Айта кетейік, биыл «Мақаншы аудандық жасөспірімдер спорт мектебі» ашылып, спорттың тоғыз түрі бойынша секциялар жұмысын жүргізіп жатыр. Мұнда 6-17 жас аралығындағы 1196 спортшы жаттығады. Соңғы үш жылда облыста 11 жаңа спорт кешені пайдалануға беріліп, тағы 6 спорт нысанының құрылысы жүріп жатыр.
