Semeytany.kz — Семей қаласында «Pana Unique Semey» бес жұлдызды қонақ үй және мейрамхана кешені ашылды. Жоба аясында 1890 жылы ағайынды Мусиндер салған, қаладағы алғашқы механикаландырылған диірмен болған тарихи ғимарат қайта жаңғыртылып, сәулеттік келбеті сақталған күйі заманауи кешенге айналды.
Кешеннің ашылу салтанатына облыс әкімі Берік Уәли қатысып, туризм мамандары, кәсіпкерлер мен өнер өкілдері жиналды. Аймақ басшысы бұл бастама өңірдің әлеуметтік-экономикалық дамуына серпін беріп, қызмет көрсету саласын өсіріп, жергілікті тұрғындарға жаңа жұмыс орындарын ашатынын айтты. Сондай-ақ жоба «Туған жерге туыңды тік» инвестициялық форумы аясында жүзеге асқанын атап өтті.
Жалпы құны 7 млрд теңге болатын бұл жоба өңірдегі ірі инвестициялық бастамалардың бірі саналады. Қайта жаңғырту жұмыстары қысқа мерзімде тәмамдалып, құрылыс кезеңінде 250 адам уақытша жұмыспен қамтылған. Кешен толық іске қосылған соң 105 тұрақты жұмыс орны ашылмақ.
Қонақүйдің жалпы ауданы 8 300 шаршы метрді құрайды. Сыйымдылығы 180 орын (91 нөмір). Кешен құрамында «Сандық», «Тары» мейрамханалары мен кофеханасы, сондай-ақ «Мадлен» және «Итальяно» ресторандары, спа орталығы және конференц-зал қарастырылған. Бұған қоса, өңір басшысы қонақ үйден жазушыларға шығармашылықпен айналысу үшін арнайы бір нөмір қарастырылғанын айтып өтті: еліміздің ақын-жазушылары Семейге келіп, 10 күнге дейін тоқтап, жұмыс істеуіне мүмкіндік бар.
Облыс әкімдігінің мәліметінше, өңірде жыл басынан бері іске асырылып жатқан жобалар саны 29-дан 97-ге дейін артқан, тартылған инвестициялар көлемі 2,2 трлн теңгеден 3,5 трлн теңгеге дейін өскен. Оның ішінде 50 жоба Ұлттық цифрлық инвестициялық платформаға енгізілген.
