Semeytany.kz — Абай облысында «Таза Қазақстан» республикалық бағдарламасы аясында өткен облыстық «Үлгілі ауыл» байқауының жеңімпаздары марапатталып, үздік шыққан 10 аудан мен 10 ауылға JINMA 904A маркалы 20 жаңа трактор салтанатты түрде табысталды. Марапаттау рәсіміне облыс әкімі Берік Уәли қатысып, байқау елді мекендердің көркеюіне серпін беретін маңызды бастама екенін атап өтті.
Байқау қорытындысында ауылдар мен аудандардың бірнеше бағыттағы жұмысы бағаланды. Атап айтқанда, интернетпен қамту, абаттандыру мен көгалдандыруда тың тәсіл қолдану, тұрмыстық қалдықтарды басқаруды жолға қою, инфрақұрылым мен туризмді дамыту, саябақтар мен жасыл желекті күтіп-ұстау, қоғамдық орындардың тазалығы, мәдени мұраны сақтау, елді мекендер арасындағы жол сапасы, сенбілік ұйымдастыру, тұрғындарды экологиялық шараларға кеңінен тарту, әлеуметтік нысандардың қолжетімділігі, инвестиция тарту және экономикалық әлеуетті нығайту сияқты 20-ға жуық номинация бойынша үздіктер анықталған.
Аймақ басшысы өз сөзінде тазалықты бір реттік науқан ретінде емес, күнделікті дағдыға айналдыру қажет екенін айтты. Оның айтуынша, өңірдің таза әрі жайлы болуы коммуналдық қызметтің ғана міндеті емес, әрбір отбасы мен әрбір азаматтың ортақ жауапкершілігі. Облыс әкімдігі байқауға белсенді қатысқан елді мекендерге берілген техникалар ауыл ішіндегі тазалық, абаттандыру және көгалдандыру жұмыстарына нақты қызмет етеді деген сенім білдірді.
Табысталған JINMA 904A тракторлары ауылдарды күтіп-ұстау, аумақты тазалау, жол жиегін реттеу, тұрмыстық қалдықтарды тасымалдау, көгалдандыру секілді күнделікті жұмыстарға пайдаланылмақ. Жаңа техниканың берілуі ауыл әкімдіктері мен жергілікті қауымға жұмыс қарқынын күшейтуге мүмкіндік береді.
Еске сала кетейік, облыс әкімі Берік Уәли жыл басында тұрғындарға арнайы үндеу жасап, жалпыөңірлік сенбілікке белсенді қатысуға шақырған болатын. Сол үндеуде жыл соңында арнайы байқау өтіп, үздіктер ынталандырылатыны айтылған.
Биыл «Таза Қазақстан» аясында өңірде ауқымды жұмыс атқарылды: тазалық шараларына 349 мыңнан астам тұрғын қатысып, 52 мың тонна қалдық шығарылды. Көгалдандыру нәтижесінде 70 мыңнан астам көшет отырғызылды. Сонымен қатар ғарыштық мониторинг арқылы анықталған 191 заңсыз қоқыс орны жойылған. Аймақ басшылығы бұл байқауды дәстүрге айналдырып, келесі жылы да жалғастыруды жоспарлап отыр.
