Semeytany.kz – Абай облысының әкімі Берік Уәли «Дарындыға дархан жол» жобасы аясында өңірдің дарынды оқушыларымен кездесіп, халықаралық және республикалық олимпиадалар, шығармашылық байқаулар мен спорт жарыстарында топ жарған 61 жеңімпаз және жүлдегермен еркін форматта әңгімелесті.
Кездесу басталар алдында аймақ басшысы оқушылардың жетістіктері мен жобалары қойылған көрмені тамашалады. Экспозицияда робототехника бағытындағы үздік жобалар, ғылыми жобалар байқауларының жеңімпаздары, Х халықаралық әскери-патриоттық «Айбын» жастар жиынының жүлдегерлері, сондай-ақ Ш.Уәлиханов атындағы «Жас Ұлан» арнайы ерлер мектеп-лицей-интернатының оқушылары ұсынған жұмыстар таныстырылды.
Еркін форматтағы жүздесуде оқушылар өз жетістіктерін айтып, алдағы мақсаттарын бөлісті және ұсыныстарын ортаға салды. Берік Уәли сөз сөйлеген әрбір қатысушыны тыңдап, пікірлеріне назар аударды. Аймақ басшысы жыл соңында халықаралық олимпиадалардың жүлдегерлері атанған 18 оқушыға облыс әкімінің атынан қомақты стипендия тағайындалатынын жеткізді.
Шара соңында қатысушыларға облыс әкімінің атынан ақшалай сертификаттар табысталды. Ресми мәліметке сәйкес, 2025 жылы Абай облысының оқушылары халықаралық және республикалық олимпиадалар мен байқауларда жалпы 277 медаль жеңіп алған. Олардың қатарында Әл-Харезми олимпиадасы, IJSO, «Туймаада» халықаралық олимпиадасы, Ө.Жолдасбеков атындағы зерттеу жобалары конкурсы және «Айбын» жастар жиыны бар.
