Semeytany.kz — Семей қаласында өңірдің үздік спортшылары мен спорт саласының қызметкерлерін марапаттауға арналған «Жыл үздігі – 2025» салтанатты шарасы өтті. Жиынға Абай облысының әкімі Берік Уәли, спорт ардагерлері, халықаралық және республикалық жарыстарда ел намысын қорғаған спортшылар, жаттықтырушылар мен сала мамандары қатысты.
Аймақ басшысы өз сөзінде спортты, әсіресе балалар мен жасөспірімдер арасында кеңінен дәріптеудің маңызын атап өтті. Оның айтуынша, 2025 жыл өңір үшін бұқаралық спортты жүйелі дамыту, спорттық-бұқаралық жобаларды көбейту және халықаралық деңгейде бәсекеге қабілетті спортшылар даярлау бағытында нақты нәтижелермен ерекшеленген. Сондай-ақ ересектер арасында дзюдо мен бокстан Қазақстан чемпионаттарының Абай облысында соңғы 30 жылда алғаш рет өтуі өңірдің спорт инфрақұрылымы мен ұйымдастырушылық әлеуетінің өскенін көрсететіні айтылды.
Шара барысында жеңімпаздар мен үздіктер бірқатар аталымдар бойынша марапатталды. Атап айтқанда, «2025 жылдың жазғы олимпиадалық спорт түрлерінің үздік спортшысы», «үздік жас спортшысы», «қысқы олимпиадалық спорт түрлерінің үздік спортшысы», «сурдлимпиадалық спорт түрлерінің үздік спортшысы», «паралимпиадалық спорт түрлерінің үздік спортшысы», «үздік аудан спортшысы», «ұлттық спорт түрлерінің үздік спортшысы», «ұлттық спорт түрлерінің үздік жас спортшысы», «көрермен көзайымы» және «2025 жыл жаңалығы» номинациялары бойынша марапаттар табысталды. Сонымен бірге әлем, Азия чемпионаттары және Азия ойындарының жеңімпаз-жүлдегерлері мен олардың жаттықтырушыларына да құрмет көрсетілді.
Кештің маңызды сәттерінің бірі ретінде 25-ші Сурдлимпиада ойындарының қола жүлдегерлері Алтынбек Кәкітаев пен Айым Жетпісбаеваға бір бөлмелі пәтердің кілттері тапсырылды.
Өңір спортының жылдық нәтижелері де айтылды. Дзюдодан Қазақстан чемпионатында Абай облысының спортшылары 2 алтын, 4 күміс және 3 қола медаль алып, жалпы командалық есепте екінші орынға тұрақтады, ал командалық жарыста жеңімпаз атанды. Бокстан Қазақстан чемпионатында да өңір спортшылары 1 алтын және 1 қола медаль иеленді.
Спорт инфрақұрылымына қатысты жаңалықтар қатарында «Туған жерге туынды тік» инвестициялық форумы аясында Семей қаласының әкімдігі мен «KAZ Minerals» ЖШС арасында меморандум жасалып, қалада 25 мың көрерменге арналған жаңа футбол стадионының құрылысы басталғаны айтылды. Бұған қоса, Абайдың 180 жылдығына орай «Абайға құрмет» акциясы аясында Семейде Павлодар облысы Үстел теннисі орталығын, Ақтөбе облысы Жекпе-жек сарайын салып беруді жоспарлап отырғаны назарға алынды.
Қорытынды ақпарат ретінде жерлесіміз Әмірғали Мұратбековтің Шортандыда өткен ҚР Кубогінде скиатлон (20 шақырым) және масс-старт (30 шақырым) жарыстарында жеңіске жетіп, Италияның Милан мен Кортин қалаларында өтетін 25-ші Қысқы Олимпиада ойындарына жолдама алғаны мәлім етілді.
