Semeytany.kz — Бүгін Астанада Мемлекеттік кеңесші Ерлан Қариннің төрағалығымен әскери-патриоттық жұмыс бойынша республикалық үйлестіру кеңесінің отырысы өтті. Жиында Абай облысы бұл бағытта еліміздегі көшбасшы өңір ретінде аталып, кеңеске бейнережимде қатысқан облыс әкімі Берік Уәли 2025 жылы атқарылған жұмыстар туралы баяндама жасады.
Аймақ басшысының айтуынша, өңірде әскери-патриоттық тәрбие беру және әскери қызметтің беделін арттыру ісі жүйелі түрде жүргізіліп келеді. Жұмысты тиімді үйлестіру үшін арнайы кеңес құрылып, жастарды әскери-патриоттық тәрбиелеудің 2030 жылға дейінгі тұжырымдамасына сай Қарулы күштер, өзге әскери құрылымдар, мемлекеттік органдар және үкіметтік емес ұйымдармен бірлескен шаралар жоспарлы түрде ұйымдастырылған.
Білім беру саласындағы нақты көрсеткіштер де келтірілді. Облыстың білім беру мекемелерінде 255 алғашқы әскери дайындық пәні мұғалімі қызмет атқарады. Оның ішінде 68-і офицер, 156-сы сержанттар мен қатардағы жауынгерлер екені айтылды. Педагогтердің кәсіби әлеуетін арттыру мақсатында 232 мұғалім біліктілікті арттыру курстарынан өткен. Сонымен қатар өңірдегі барлық орта білім беру мекемелерінде «Ерлік сабақтары» өткізілген.
Қазіргі уақытта Абай облысындағы «Жас сарбаз» жасөспірімдер қозғалысына 7047 оқушы қатысады. Қозғалыс құрамындағы үйірмелер мен сыныптарға салалық бағыттарына қарай Шығыс өңірлік қолбасшылығы, Ұлттық ұлан әскерлері, Төтенше жағдай департаменті секілді құрылымдар жетекшілік етеді.
Баяндаманың маңызды бөлігі халықаралық «Айбын» әскери-патриоттық жиынына арналды. Биыл Ақтөбе қаласындағы «Айбын» полигонында өткен байрақты бәсекеге ел Президенті Қасым-Жомарт Тоқаев қатысқан. Алты елдің командалары бақ сынаған додада Семейдегі облыстық Ш.Уәлиханов атындағы «Жас Ұлан» арнайы мектеп-лицейі бас жүлдені иеленіп, «Абай қырандары» құрама командасы бірінші орын алған. Жеңімпаздар Мемлекет басшысының қолынан марапат алып, дәстүрлі «Жалынды жас патриот» төсбелгісімен де атап өтілген.
Өңірде патриоттық бағыттағы шаралар тұрақты түрде өткізіліп келеді. Атап айтқанда, «Қазақстан армиясының бір күні», «Айбын», «Алау», «Абай мергені» сайыстары, «Jas Sarbaz Chess Cup» шахмат турнирі, «Қалқан» қысқы спартакиадасы, патриоттық әндер фестивалі сияқты жобалар қоғам тарапынан қолдау тауып отырғаны айтылды.
Жыл қорытындысымен облыста жауынгерлік даярлықта жоғары нәтиже көрсеткен 54 азамат тиісті грантқа ие болған. Ал мерзімді әскери қызметке салтанатты шығарып салу рәсімдері қаладағы тарихи нысандар мен оқу орындары базасында ұйымдастырылған. Абай облысында әскери-патриоттық тәрбие жұмыстары алдағы уақытта да жалғасын табатыны мәлімделді.
