Semeytany.kz — «Қазақстан Республикасының Сайлау туралы» заңына сәйкес 2025 жылдың 26 желтоқсанынан бастап Нұрбек Тұрсынқанұлы Қошқарбаев Көкпекті ауданының әкімі қызметіне сайланды.
Көкпекті ауданында 21 желтоқсан күні өткен тікелей сайлаудың қорытындысы бойынша Нұрбек Қошқарбаев 70,8 пайыз дауыс жинап, жеңіске жеткен. Бүгін облыс әкімі Берік Уәли жаңа сайланған әкімді аудан активіне таныстырды.
Жиын барысында Көкпекті ауданының аумақтық сайлау комиссиясының төрағасы Ерасыл Оразханов Нұрбек Қошқарбаевқа әкім куәлігін салтанатты түрде табыстады.
Облыс әкімі өз сөзінде Нұрбек Тұрсынқанұлының мемлекеттік қызметтегі тәжірибесін атап өтіп, Көкпектінің ауыл шаруашылығы бағытында әлеуеті жоғары аудан екенін айтты. Сондай-ақ өңірде қордаланған мәселелер барын еске салып, жаңа әкім туған жерінің әлеуметтік-экономикалық дамуына, инфрақұрылымының жақсаруына күш салатынына сенім білдірді.
Нұрбек Тұрсынқанұлы Көкпекті ауданы, Көкпекті ауылында дүниеге келген. Еңбек жолын Семей қаласындағы №33 орта мектепте бастауыш сыныптарда орыс тілі пәнінің мұғалімі болып бастап, кейін білім бөлімі мен қала әкімдігі құрылымдарында түрлі лауазымдар атқарған. Әр жылдары Курчатов қаласы әкімі аппаратын басқарды, қала әкімінің орынбасары болды. 2024 жылдың 23 желтоқсанынан бері осы уақытқа дейін Абай облысы Бесқарағай ауданының әкімі қызметін атқарған.
Қазіргі таңда Нұрбек Қошқарбаев 2025 жылдың 26 желтоқсанынан бастап Көкпекті ауданының әкімі ретінде міндетін ресми түрде бастады.
