Semeytany.kz – Көкпекті ауданындағы Көкжайық және Тассай ауылдарында «Ауыл құтқарушылары» бағдарламасы аясында ерікті өрт сөндіру бекеттері пайдалануға берілді.
Көкжайық ауылдық округінде ашылған бекет Көкжайық, Қарамойыл, Ақой және Қарағандыкөл елді мекендерінің өрт қауіпсіздігін күшейтеді. Бұл аумақта 460 тұрғын үй, 1 455 адам бар. Ал Тассай ауылдық округіндегі бекет Тассай, Қайнар, Ақсу және Үшкөмей ауылдарына қызмет көрсетіп, 319 тұрғын үй мен 1 088 тұрғынды қамтиды.
Сонымен қатар Бесқарағай ауданында орман және дала өрттерінің алдын алу өзектілігін ескеріп, соңғы күндері Бөдене, Ерназар және Қарабас ауылдарында да жаңа өрт сөндіру бекеттері ашылып, іске қосылды. Аудан аумағының 400 мың гектарға жуығын ну орман алып жатқандықтан, мұндай нысандардың маңызы ерекше.
Қарабас ауылындағы ашылу рәсіміне аудан әкімінің міндетін атқарушы Ділдар Қалиқанұлы қатысып, тұрғындар мен орман алқаптарының қауіпсіздігін сақтау – аудан басшылығының басты міндеті екенін атап өтті. Ол Бесқарағай ауданында Семей орманы резерватының 6 филиалы орналасқанын айтып, орман қызметкерлері мен жергілікті өрт бекеттерінің үйлесімді жұмысы өрттің алдын алуда шешуші рөл атқаратынын жеткізді.
Жаңа пункттер тәулік бойы қызмет көрсетуге бейімделген заманауи құрал-жабдықтармен қамтамасыз етілген. Ғимарат ішінде демалыс бөлмесі, ас үй аймағы, санитарлық торап және жуынатын бөлме қарастырылған. Бекеттер тұрмыстық, дала және орман өрттері кезінде жедел әрекет етуге бағытталған.
Айта кетейік, «Ауыл құтқарушылары» бағдарламасы аясында 2026 жылы ауданның тағы бірқатар елді мекендерінде осындай өрт сөндіру бекеттерін салу жоспарланып отыр.
