Semeytany.kz — Бүгін Абай облысының әкімі Берік Уәли ақын, «Парасат» және «Құрмет» ордендерінің иегері, Абай ауданының Құрметті азаматы Төлеген Жанғалиевпен кездесті. Аймақ басшысы қаламгерді 2025 жылғы мәдениет саласындағы мемлекеттік стипендия иегері атануымен құттықтады.
Кездесу барысында облыс әкімі бұл марапатты ақынның көп жылғы шығармашылық еңбегіне берілген әділ баға ретінде атап өтті. Берік Уәли Төлеген Жанғалиевтің Қарауылда тұрып-ақ елге танылған құнды дүниелер жазғанын, сондай-ақ талай шәкірт тәрбиелеп, өңірдің руханиятына елеулі үлес қосқанын айтты.
Өз кезегінде Төлеген Жанғалиев арнайы қабылдағаны үшін алғыс білдіріп, Мемлекет басшысының Абай мұрасын дәріптеуге айрықша мән беріп келе жатқанын сөз етті. Ол Президенттің «Түркістан» газетіне берген сұхбатында Абайдың қоғамдағы кемшіліктерді бүкпесіз айтып, «Толық адам» ілімі арқылы дұрыс жол нұсқағанын, ал «Қара сөздердің» бүгін де өзектілігін жоғалтпағанын еске салды. Ақын мемлекеттік стипендияны жеке шығармашылығына ғана емес, Абай еліне көрсетілген құрмет деп бағалады.
Төлеген Жанғалиев – 10-нан астам жыр жинақтарының авторы, Қазақстан Жазушылар одағының мүшесі. Сонымен бірге ол Мерғали Ибраев атындағы «Ақсұңқар» ақындар сыныбына жетекшілік етеді.
Кездесу соңында аймақ басшысы қаламгерге шығармашылық шабыт, ұзақ ғұмыр тілеп, өңір руханиятын көтеретін бастамалар алдағы уақытта да қолдау табатынын жеткізді.
