Semeytany.kz – Абай облысының әкімі Берік Уәлидің төрағалығымен өткен жиында өңірдің білім саласындағы өзекті мәселелері талқыланды. Басқосуда білім басқармасының басшысы Бауыржан Ердембеков атқарылған жұмыстар мен жүзеге асқан жобалар туралы баяндады.
2025 жылы облыста білім беру инфрақұрылымын дамыту, оқушы орындарының тапшылығын азайту бағытында жүйелі жұмыс жүргізілген. Мемлекет басшысының бастамасымен іске асырылып жатқан «Келешек мектептері» ұлттық жобасы аясында өңірде 4 мектеп пайдалануға берілді. Атап айтқанда, Бесқарағай ауданында 300 орындық, Аягөз ауданында 600 орындық, Семей қаласының Қарағайлы ықшам ауданында 1200 орындық, Водный кентінде 600 орындық жаңа білім ордалары оқушыларға есігін ашты. Қазіргі уақытта облыс орталығындағы Шығыс кентінде 300 орындық мектептің құрылысы жалғасып жатыр.
Жиында апатты деп танылған мектептер мәселесінің де назардан тыс қалмай отырғаны айтылды. Жарма ауданының Суықбұлақ ауылында 100 орындық жаңа мектеп салынып жатыр. Ақсуат ауданындағы Екпін ауылында 300 орындық мектептің құрылысы басталмақ. Ал Семей қаласындағы №11 мектептің орнына жаңа мектеп салуға құжаттар әзірлену үстінде. Бұдан бөлек, Семейдегі №4 және №30 мектептерде қосымша ғимараттар салынып жатыр. Бұл жобалар толық аяқталса, мыңға жуық балаға қолайлы әрі сапалы оқу жағдайын жасауға мүмкіндік береді.
Өңірдегі маңызды нысандардың бірі – Семейде 2025 жылдың соңында ашылған көпфункционалды Оқушылар сарайы. Нысанның жалпы ауданы 9 800 шаршы метрді құрайды. Ғимарат бір мезетте 500 балаға лайықталып, ауысыммен 1500 оқушыға дейін қабылдай алады.
Сондай-ақ өткен жылы облыстағы 12 мектепке күрделі жөндеу жүргізуге 2,9 млрд теңге бағытталған. Оның 9-ы толық реновациядан өтіп, заманауи жабдықтармен қамтамасыз етілді. Бұған қоса, облыстың 75 мектебіне 131 оқу кабинеті сатып алынды, оның ішінде 89-ы жаңа модификациядағы кабинеттер. Ауылдағы қосымша білім беруді күшейту мақсатында «Қазақстан халқына» қорының қолдауымен 36 мектеп 58 кабинетпен және 4 балалар шығармашылық орталығы 500 млн теңгеге техникалық-ғылыми, stem бағытындағы жаңа модификациялық кабинеттермен жабдықталған.
Аймақ басшысы білім сапасын арттыру мен балаларға тең мүмкіндік беру мәселесі үнемі назарда болатынын атап өтті. Оның айтуынша, «Келешек мектептері» бой көтеріп, қолданыстағы білім ұйымдары кезең-кезеңімен жаңғыртылып келеді, сондай-ақ балалардың бос уақытын тиімді ұйымдастыру, қосымша біліммен қамту жұмыстары да жалғаса береді.
