Semeytany.kz — Бүгін облыс әкімі Берік Уәли Семей қаласының Қарағайлы ықшам ауданында орналасқан «BB Nura» нефрологиялық орталығына барып, медициналық мекеменің қызметімен танысты.
Аталған орталық Абай облысы тұрғындарына нефрологиялық көмектің толық циклін ұсынады. Мұнда тәулік бойы жұмыс істейтін 24 төсектік стационар, 40 орындық амбулаториялық диализ бөлімі, сондай-ақ ересектер мен балаларға арналған консультациялық-диагностикалық қызметтер қарастырылған. Орталық созылмалы бүйрек ауруына шалдыққан науқастарға тәулік бойы және күндізгі стационар жағдайында кешенді медициналық көмек көрсетеді.
Нысан жеке инвестор қаражатына салынып, былтыр қазан айында жұмысын бастаған. Жобаның инвестиция көлемі 1,5 млрд теңгені құрайды. Орталықта 40 тұрақты жұмыс орны ашылған.
Нефрологиялық орталықтың өңірлік директоры Индира Әзімбаеваның айтуынша, бұл мекеме науқастар үшін қолайлы: мұнда нефролог кеңесін алып, қажет болған жағдайда тәуліктік стационарға жатып ем қабылдауға мүмкіндік бар. Қазіргі уақытта Абай облысында 137 адам бүйрек алмастыру емін алып жүр, оның 100-і Семейде емделуде.
Орталықтың Аягөз және Үржар аудандарында бөлімшелері жұмыс істейді. Жақын уақытта Бородулиха ауданында тағы бір филиал ашу жоспарланған. Аймақ басшысы орталықты аралап, дәрігерлермен пікірлесіп, жаңа медициналық нысанның өңір тұрғындары үшін маңызы зор екенін атап өтті.
Облыс әкімі өңірде денсаулық сақтау инфрақұрылымын нығайту жұмыстары жалғасып жатқанын жеткізді. «Ауылдық денсаулық сақтауды жаңғырту» ұлттық жобасы аясында 60-тан астам алғашқы медициналық-санитарлық көмек нысаны салынған. Сондай-ақ арнайы мемлекеттік қор қаржысы есебінен Семейде 100 орындық психоневрологиялық медициналық-әлеуметтік мекеме құрылысы аяқталған. Үржарда тері коронарлық араласу орталығына қосымша ғимарат, ал Аягөзде магнитті-резонанстық томографқа арналған нысанның құрылысы жүргізілуде. Бұдан бөлек, ана мен бала денсаулығын қолдау мақсатында «Салауатты ана» пансионаты ашылған. Мемлекет басшысының тапсырмасына сәйкес Семейде 300 орындық облыстық көпсалалы клиникалық аурухана салуға жобалық-сметалық құжаттама әзірленіп жатыр.
