Semeytany.kz — Абай облысының әкімі Берік Уәли Семей қаласын аралау барысында дарынды балаларға арналған облыстық «Білім-Инновация» лицейіне барып, оқу орнының тыныс-тіршілігімен танысты. Аймақ басшысы оқу үдерісін, материалдық-техникалық базасын көріп, ұжым көтерген өзекті мәселелерге назар аударды.
Лицей ғимараты 1984 жылы балабақша ретінде салынған, ал білім ордасы 1994 жылдан бері жұмыс істейді. Қазір мұнда 222 оқушы білім алып жатыр, 31 мұғалім еңбек етеді.
Оқу орны соңғы жылдары жетістігімен ерекшеленіп келеді. Республикалық олимпиадалардың қорытындысы бойынша лицей «100 үздік олимпиадалық мектеп» тізіміне енген. Бұдан бөлек, «Үздік ұйым – 2025» облыстық байқауында жеңімпаз атанып, 30 миллион теңге грантқа ие болған. Сонымен қатар, лицей 2011 жылдан бері өңірдің үздік олимпиадалық командасы мәртебесін сақтап келеді.
Мектеп интернат режимінде жұмыс істейді. Оқушылардың жан-жақты дамуына, зияткерлік әлеуетін арттыруына қажетті жағдай жасалғанымен, оқу орнының бірқатар түйткілі бар. Мектеп директоры Серік Айдарбеков білім ордасының материалдық-техникалық базасы ескіргенін, оқу кабинеттері тар екенін айтып, жаңа ғимарат салу қажеттігін жеткізді.
Аймақ басшысы сынып кабинеттері мен спорт залын аралап, оқушылар және мұғалімдермен тілдесті. Ол лицейдің білім сапасына, шәкірттердің жетістігіне жоғары баға беріп, көтерілген мәселелер назардан тыс қалмайтынын айтты. Әкімнің сөзінше, жаңа ғимараттың жобалық-сметалық құжаттамасы әзір, ендігі қадам – оны Үкіметке ұсынып, қаржы бөлу мәселесін көтеру.
