Semeytany.kz — Бесқарағай ауданында ауылдардағы мәдени инфрақұрылымды жаңғырту жұмыстары кезең-кезеңімен іске асып келеді. Қазір ауданның Беген, Глуховка және Ерназар ауылдарында әрқайсысы 100 орынға шақталған Мәдениет үйлерінің құрылысы жүргізіліп жатыр.
Жаңа нысандар ауыл тұрғындарының бос уақытын тиімді өткізуіне, шығармашылық үйірмелер мен мәдени шараларды тұрақты ұйымдастыруға мүмкіндік бермек.
Беген ауылы да – өңірдің рухани-мәдени тарихында орны бөлек мекен. Бұл ауылдан қазақ өнерінің көрнекті өкілі, композитор әрі ақын Төлеген Мұхамеджанов, сондай-ақ ҚР Мемлекеттік сыйлығының лауреаты, профессор, Қазақстанның еңбек сіңірген мәдениет қайраткері және Қазақстанның еңбек сіңірген әртісі Меңтай Өтепбергенов шыққан.
Қазіргі таңда Бесқарағай ауданында тұрғындарға 1 Мәдениет үйі, 10 ауылдық клуб, 1 орталық кітапхана және 19 ауыл кітапханасы тұрақты қызмет көрсетеді. Аудандық Мәдениет үйі жанынан «Бесқарағай үні» ұлттық аспаптар ансамблі, «Экситон» халық би ансамблі, «Чародей» үлгілік би ансамблі және халық театры жұмыс істеп келеді.
Аталған үш ауылдағы мәдениет нысандарының құрылысы биыл аяқталып, ел игілігіне берілетіні айтылды.
