Semeytany.kz — Абай облысындағы медициналық ұйымдар биыл қыркүйек айына дейін 100 жаңа санитарлық автокөлікпен қамтамасыз етіледі. Соның алғашқы легі ретінде облыс әкімі Берік Уәли Семей қаласындағы облыстық жедел медициналық жәрдем станциясына 10 жаңа көліктің кілтін салтанатты түрде табыстады.
Қазіргі таңда бұл станция санитарлық автокөлікпен толық қамтылғанымен, қолданыстағы техникалардың тозу деңгейі 90 пайыздан асып кеткен. Мәселені шешу үшін өткен жылы «Абай облысы медициналық ұйымдары үшін санитарлық автокөлік сатып алу» жобасы аясында лизингтік қаржыландыру жолымен Hyundai, JAC және «Газель» маркалы 100 жаңа көлік алынған. Оның 67-сі облыстық жедел медициналық жәрдем станциясына, 33-і аудандық медициналық ұйымдарға беріледі. Жаңа автокөліктердің барлығы GPS-навигациямен және шақыртуға шыққан кезде қажет болатын медициналық жабдықтармен толық жарақталған.
Салтанатты рәсімде аймақ басшысы денсаулық сақтау саласын дамыту өңір үшін басым бағыт екенін атап өтіп, жаңа техникалар шұғыл көмектің сапасы мен тиімділігін арттыратынын айтты. Сондай-ақ бұл бағытта соңғы рет көліктер 2020 жылы алынғанын, арада бес жарым жыл өткенде автопаркті жаңарту мәселесі өзекті болғанын жеткізді.
Облыстық жедел медициналық жәрдем станциясында 872 адам еңбек етеді. Мекеме 620 мыңнан астам тұрғынға күн сайын қызмет көрсетіп, жылына 250 мыңнан астам шақыртуға шығады.
Өңірдегі медицина инфрақұрылымын күшейту жұмысы да қатар жүріп жатыр: өткен жылы алғашқы медициналық-санитариялық көмек көрсететін 60-тан астам жаңа нысан салынды. Мақаншыда күндізгі стационары, зертханасы және әйелдер консультациясы бар дәрігерлік амбулатория ашылды. Аягөз аудандық ауруханасында 10 төсектік реанимация бөлімшесінің қосымша құрылысы аяқталып, сол мекемеде МРТ орналастыруға арналған қосымша ғимарат құрылысы басталды. Үржар аудандық ауруханасы базасында «Тері арқылы коронарлық араласу орталығының» қосымша ғимараты да салынып жатыр. Үкімет қолдауымен бой көтеретін 300 орындық облыстық көпбейінді аурухана мен 200 орындық балалар ауруханасының жобалық-сметалық құжаттамалары әзірленуде. Жалпы 2025 жылы өңірдің денсаулық сақтау саласының материалдық-техникалық базасын жаңғыртуға 6,5 млрд теңгеден астам қаржы бөлінген.
