Semeytany.kz — Бүгін облыс әкімі Берік Уәлидің төрағалығымен өңірдегі ірі құрылыс жобаларының жүзеге асу барысына арналған арнайы жиын өтті. Басқосуға салаға жауапты басқарма басшылары мен аудан әкімдері қатысты.
Жиында 2025 жылдың қорытындысы бойынша аймақтағы құрылыс-монтаж жұмыстарының көлемі 354 млрд теңгені құрағаны айтылды. Ал 2026 жылы бұл көрсеткіш 379 млрд теңгеге жетеді деп күтілуде. Қазіргі таңда облыста бюджет қаражаты есебінен 35 әлеуметтік нысанның құрылысы жалғасып жатыр. Сонымен бірге off-take келісімдер аясында білім, спорт және мәдениет бағытындағы бірқатар жобалар қолға алынған.
Президенттің қолдауымен басталған «Абайға құрмет» акциясы шеңберінде 16 жоба әзірленіп жатқаны да жиында назарға алынды. Бұл бағытта басқа облыстармен қатар ұлттық компаниялармен де жаңа ғимараттар салуға қатысты келіссөздер жүріп жатыр.
Семей қаласының Водный, Бобровка және Ұшақтар кентінде дене шынықтыру-сауықтыру кешендері салынып жатыр. Облыс орталығында 18 жастан асқан азаматтарға арналған 100 орындық психоневрологиялық медициналық-әлеуметтік мекеменің құрылысы аяқталған. Сондай-ақ чиптер мен электронды қондырғылар өндіретін индустриялық парк пен 25 мың орындық стадион құрылысы басталғаны айтылды.
Аудандардағы жобаларға тоқталсақ, Жарма ауданының Суықбұлақ ауылында 100 орындық жаңа мектептің құрылысы жүріп жатыр. Жеке инвесторлардың қаражатына Жаңасемей ауданында ірі ет комбинаты, ал Абай ауданында «Этно ауыл Жидебай» туристік кешені қарқынды салынып жатқан нысандар қатарында аталды.
Аймақ басшысы жиында әрбір ғимараттың өңір үшін маңызы зор екенін атап өтіп, құрылысы басталған барлық нысандарды белгіленген мерзімде әрі сапалы аяқтауды тапсырды. Сонымен қатар іргетасы қаланып, бірақ жұмысы баяулаған жобаларға ерекше назар аударып, құрылыс қарқынын күшейтуді талап етті. Салаға жауапты орынбасарлары мен басқарма басшыларына нысандардың барысын қатаң бақылауда ұстап, жобалардың уақытында іске асуын қамтамасыз етуді жүктеді.
«Бүгін өңірімізде салынып жатқан әлеуметтік және инфрақұрылымдық нысандардың қазіргі жағдайын, құрылыс барысын және туындаған мәселелерді талқылау үшін жиналып отырмыз. Жобалардың басты мақсаты – тұрғындардың әлеуметтік-экономикалық жағдайын жақсарту, инфрақұрылымды дамыту және өңірді көркейту. Әр нысанның уақтылы әрі сапалы іске қосылуы өңірдің даму қарқынына тікелей әсер етеді. Осындай жиынды үш аптада бір рет өткізіп тұрамыз. Әр нысан жеке бақылауымда болады», – деді облыс әкімі.
