Семей медицина университетінің ректоры – басқарма төрағасы Алтай Дюсупов Қазақстан Республикасының Конституциясына ұсынылып отырған өзгерістер денсаулық сақтау саласының дамуына тікелей ықпал ететін маңызды құқықтық негіз қалыптастыратынын атап өтті.
Оның айтуынша, жаңа Конституция жобасында адам құқықтары мен бостандықтарының ең жоғары құндылық ретінде айқындалуы азаматтардың сапалы әрі қолжетімді медициналық көмек алу құқығын күшейтетін шешуші қадам болмақ.
Ректордың пікірінше, Ата Заңда әділеттілік, заң үстемдігі және адамға бағдарланған мемлекет қағидаттарының бекітілуі бір жағынан пациент құқықтарын қорғауды күшейтсе, екінші жағынан медицина қызметкерлерінің де кәсіби және құқықтық қауіпсіздігін қамтамасыз етуге бағытталған. Бұл денсаулық сақтау жүйесінде сенім мен жауапкершілікті арттыруға мүмкіндік береді.
Алтай Дюсупов білім, ғылым және инновацияны ел дамуының негізгі басымдығы ретінде айқындау медициналық ғылымды, клиникалық зерттеулерді, биомедицина мен жасанды интеллектіні медицина саласына енгізуді жаңа деңгейге көтеретінін айтты. Сонымен қатар, цифрлық ортада азаматтардың құқықтарын қорғауға арналған жаңа нормалар электронды медициналық деректердің қауіпсіздігін қамтамасыз етуге жол ашатынын жеткізді.
Ол экология мен табиғатқа ұқыпты қарау қағидаттарының конституциялық деңгейде бекітілуін де маңызды деп бағалады. Мұндай норма қоғамдық денсаулықты қорғау, экологиялық және радиациялық қауіпсіздік мәселелеріне жүйелі көзқарас қалыптастырады деген пікір білдірді.
Жалпы алғанда, ректор ұсынылып отырған конституциялық реформалар денсаулық сақтау жүйесін тұрақты дамытуға, медицинаның сапасын арттыруға және халық денсаулығын қорғаудың берік құқықтық негізін қалыптастыруға қызмет етеді деп сенетінін айтты.
Сөз соңында Семей медицина университеті ұсынылып отырған конституциялық реформаларды қолдайтынын және оларды денсаулық сақтау саласының сапалы дамуына бағытталған маңызды қадам деп санайтынын мәлімдеді.
