Шәкәрім университетінің стратегия және әлеуметтік даму жөніндегі проректоры Асқар Қасымов экология тақырыбын «Таза Қазақстан» жалпыұлттық экологиялық акциясынан бастап, Конституция деңгейіндегі өзгерістерге дейінгі біртұтас үдеріс ретінде бағалайды.
Оның айтуынша, экология мен қоршаған ортаның тазалығы – Мемлекет басшысы әрдайым ерекше назар аударып келе жатқан басым бағыттардың бірі. Ал «Таза Қазақстан» акциясы бір реттік шара емес, қоғамның экологиялық мәдениетін қалыптастыруға бағытталған жүйелі қадам ретінде ұсынылған. Проректор Президенттің бұл бастамаға формалды емес, саналы әрі жауапты көзқараспен қарауға шақырғанын да атап өтеді.
Асқар Қасымов бұл бағыттан Шәкәрім университеті де шет қалмағанын айтады. Университеттің білім беру, ғылыми-зерттеу және тәрбиелік қызметінде экология, табиғатты қорғау және тұрақты даму мәселелері тұрақты түрде көтеріліп келеді. Яғни, экологиялық жауапкершілік оқу орнының күнделікті жұмысына сіңген ұстаным ретінде көрінеді.
Проректордың пайымынша, бүгін табиғатқа ұқыпты қарау қажеттілігі әлдеқайда жоғары деңгейге көтеріліп отыр. Бұл ұстанымды Қазақстан Республикасының Конституциясында нақты бекіту ұсынылуы — соның айғағы. Ол Конституцияның 34-бабына енгізілетін нормаларда үш негізгі қағида айқындалатынын атап өтеді:
біріншіден, азаматтар табиғатты сақтауға және табиғи байлыққа ұқыпты қарауға міндетті;
екіншіден, мемлекет адамның өмір сүруіне және денсаулығына қолайлы қоршаған ортаны қорғауды мақсат етеді;
үшіншіден, адам өмірі мен денсаулығына қатер төндіретін фактілер мен мән-жайларды лауазымды адамдардың жасыруы заңға сәйкес жауаптылыққа алып келеді.
Асқар Қасымов бұл жаңалықтарды жай ғана құқықтық түзету деп қарауға болмайтынын айтады. Оның ойынша, бұл — қоғамның экологияға деген көзқарасының эволюциясы, азаматтық жауапкершіліктің жаңа деңгейі. Табиғатты қорғау енді тек моральдық таңдау емес, әр азаматтың конституциялық міндеті ретінде айқындалып отыр.
Осы тұрғыдан алғанда, проректор ұсынылып отырған өзгерістерді орынды әрі уақытында көтерілген, елдің ұзақ мерзімді дамуына қызмет ететін маңызды қадам деп бағалайды. Таза қоршаған орта — тек бүгіннің емес, келер ұрпақ алдындағы ортақ жауапкершілік екенін де ерекше атап өтеді.
