Semeytany.kz – Абай облысы бойынша Мемлекеттік кірістер департаменті салық төлеушілерге 2026 жылғы 1 наурызға дейін арнайы салық режимін (АСР) таңдау қажет екенін еске салды.
2026 жылғы 1 наурыздан бастап 2025 жылы патент негізіндегі АСР-ды немесе арнайы мобильді қосымша арқылы АСР-ды қолданған жеке кәсіпкерлер салық органдарымен автоматты түрде жеке кәсіпкер ретінде есептен шығарылады. Есептен шығару күні ретінде 2026 жылғы 1 қаңтар танылады. Ал егер салық төлеуші басқа салық режимін таңдағаны туралы хабарлама ұсынған болса, автоматты есептен шығару жүргізілмейді.
Өзін-өзі жұмыспен қамтығандарға арналған АСР-ды қолдану «e-Salyq Business» мобильді қосымшасында алғашқы чектің қалыптастырылған күнімен есептеледі.
Сондай-ақ оңайлатылған декларация негізіндегі АСР-ды қолдануды жоспарлаған азаматтар мен кәсіпкерлер 2026 жылғы 1 наурызға дейін қолданылатын салық режимі туралы хабарлама беруі тиіс. Белгіленген мерзімге дейін хабарлама ұсынылмаса, салық төлеуші 2026 жылғы 1 қаңтардан бастап жалпыға бірдей белгіленген салық салу тәртібіне ауыстырылған болып есептеледі.
Хабарламаны мына тәсілдер арқылы ұсынуға болады:
- Салық төлеушінің кабинеті арқылы;
- «E-Salyq Business» мобильді қосымшасы арқылы;
- орналасқан жері бойынша мемлекеттік кірістер органына қағаз түрінде;
- банктердің мобильді қосымшалары арқылы.
Қазіргі таңда бұл сервис Kaspi Bank, Банк ЦентрКредит және Халық Банк мобильді қосымшаларында қолжетімді екені нақтыланды.
Ал шаруа немесе фермер қожалықтарына арналған режимге көшу 2026 жылғы 1 наурызға дейін салық органдары арқылы автоматты түрде жүзеге асырылады және қосымша хабарлама беруді талап етпейді.
Департамент тұрғындарды және кәсіпкерлерді өзіне тиімді салық режимін белгіленген мерзімге дейін уақытылы таңдауға шақырды.
