Semeytany.kz — Бородулиха ауылында «BB Nura» емханалар желісіне қарасты гемодиализ орталығы ашылып, өз жұмысын бастады. Жаңа медициналық нысан созылмалы бүйрек жеткіліксіздігіне шалдыққан тұрғындарға тұрғылықты жерінен алысқа шықпай-ақ мамандандырылған ем қабылдауға мүмкіндік береді.
Жоба аудан әкімдігінің қолдауымен, облыстық мәслихат депутаты, «Жерновское» ЖШС директоры Азамат Әубәкіровтің демеушілігі арқылы жүзеге асқан. Орталықтың ашылу рәсіміне аудан әкімінің міндетін атқарушы Талғат Мұратов қатысып, ауыл тұрғындарын қажетті еммен дер кезінде және жергілікті жерде қамту маңызды міндет екенін атап өтті.
Қазір аудан бойынша шамамен 20 науқас гемодиализ процедурасын қабылдап жүр. Бұған дейін олар өмірлік маңызы бар ем алу үшін облыс орталығына қатынауға мәжбүр болған. Енді бұл қызмет Бородулиха ауылының өзінде көрсетілетін болды.
Жаңа орталық заманауи медициналық құрал-жабдықтармен қамтылған. Мұнда облыстық деңгейдегі қызмет көрсетуге жағдай жасалған. Қазіргі таңда орталықта 4 адам еңбек етеді.
Аталған нысанның іске қосылуы аудан тұрғындары үшін медициналық көмектің қолжетімділігін арттырып, науқастардың өмір сапасын жақсартуға жол ашады.
