Дәуір алмасып, замана өзгерсе де, өз мәнін жоймайтын құндылықтар бар: адамгершілік, адамзаттың түп тарихына һәм табиғат — анаға деген құрмет сезімдері. Ал осынау құбылыстар аңыз бен шынайы өмір желісін үйлестіру арқылы ғажап суреттелетін көркем шығармалардың бірі – Шың—ғыс Айтматовтың әйгілі «Ақ кеме» повесі. Сондықтан болар, бұл туынды Кеңес заманында—ақ кино, қала берді театр сахнасына лайықталды.
{jcomments on}Аталмыш спектакльді таяу аралықта Семейдегі Достоевский атындағы орыс драма театрының әртістері сахналамақ. Қоюшы-режиссер — литвалық драматург Линас Мариюс Зайскаускас. Есімі Шығыс Еуропа һәм ТМД елдеріне танымал өнер адамының бұл — Қазақстанға жасаған екінші сапары екен. Осыған дейін Алматы шаһарында ағылшын жазушысының туындысын сахнаға шығарыпты. Ал Семейге аталмыш театр директоры Яков Горельниковтың шақыруымен арнайы келіп, актерлерді даярлап жатыр.
— Шығармашылығымда бірнеше спектакль бар. Яков Веняминовичке солардың бірқатарын ұсынғанымда тек Ш.Айтматовтың «Ақ кеме» повесінің желісі бойынша жазылған туындыны таңдады. Осыған дейін бұл қойылымды Башқұртстан астанасы Уфа қаласында сахнаға шығарып едім, — дейді Л.Мариуюс Зайскаускас.
Бүгінге дейін 80-нен аса қойылымды сахналаған режиссер аталмыш спектакльдің жаңашылдығы мол екенін айтады. Мәселен, сахна төрінде суреттік кескіндемелер көрсетілетін алып экран, жанды оркестр бар. Тек қиянатшылдық пен зұлымдықты дәл көрсету үшін сахнаға бұғы ұшасын алып шығу ғана техникалық себептерге байланысты мүмкін болмапты. Ал повесть желісі бойынша, шынайы өмір мен аңыз әпсанасы қатар өріледі. Сахнада Марал ана сынды мифтік кейіпкерлер де бар. Мұндай образдарды бірнеше актерлер қатар сомдайды. Алайда шығарманың негізгі өзегі – кіршіксіз таза бала әлемінің ересектердің қиянатқа толы өміріне төзе алмауы, табиғатқа жасалған жауыздық, қоғамдағы әділетсіздік. Бұл идеяны беруде қоюшы-режиссер мен қоюшы-суретші ерекше сахналық декорацияға сүйенбек.
Ал басты рөлдерде театрдың майталман актерлері ойнайды. Мәселен, басты кейіпкерлер — Момын шал рөлінде ҚР Мәдениет қайраткері Федор Любецкий, балақай рөлінде Александр Сухов, ал Марал ана бейнесін Елена Дручинина сомдамақ.
Өнерпаздардың репетициялық жұмыстарына екі айдан аса уақыт өтіпті.
– Бұрын — соңды мұндай ұзақ даярлық біздің театрда орын алған емес. Сол себептен де образға ену мен сахналық декорацияға ерекше мән берілуде. Демек, семейлік өнерсүйер көрермен үшін тың тарту әзірленуде деген сөз, — дейді актер А.Сухов.
Қуаныш ЖОЛЫМБЕТ,
«Семей таңы»
