Бесқарағай ауданында әлеуметтік-экономикалық даму бағытында бірқатар жұмыстар атқарылып, ауыл шаруашылығы, инфрақұрылым, кәсіпкерлік, әлеуметтік сала және туризм бағыттарында жобалар жүзеге асырылуда. Аудан құрамына 10 ауылдық округ пен 28 елді мекен кіреді. Халық саны 16 740 адамды құрайды. Бұл туралы Өңірлік коммуникациялар қызметі алаңында өткен брифингте Бесқарағай ауданының әкімі Ділдар Қалиқан мәлімдеді.
– Бесқарағай ауданының әлеуметтік-экономикалық дамуының негізгі бағыттарының бірі – ауыл шаруашылығы. Бүгінде бұл салада мал шаруашылығы мен егін шаруашылығын дамыту, суармалы егіншілік көлемін арттыру және жаңа өндірістік жобаларды іске асыру жұмыстары жүргізілуде, – деді аудан әкімі.
Бүгінде аудандағы жалпы мал басы 170 552 басты құрайды. Ал егіс көлемі 66 555 гектарға жетеді. Суармалы егіншілікті дамыту бағытында екі ірі жоба жүзеге асырылуда.
Қарабас ауылында «Abai Poultry Agro» серіктестігі 8,5 млрд теңгеге құс фабрикасының құрылысын бастады. Жоба аясында жылына 150 млн дана жұмыртқа өндіру және 150 тұрақты жұмыс орнын ашу жоспарланған.
Инфрақұрылым бағытында да жұмыстар жалғасуда. Бүгінде 24 ауылдық елді мекен орталықтандырылған су жүйесіне қосылған. Бұл халықтың 79,2 пайызын сапалы ауыз сумен қамтамасыз етуге мүмкіндік беріп отыр. Сонымен қатар, аудандық маңызы бар Канонерка–Белокаменка жолының 8,5 шақырымын жөндеу жұмыстары аяқталды.
Туризм саласында Шипалы көлін дамытуға басымдық берілуде. Көлге электр энергиясын тарту жұмыстары аяқталу сатысында. Биыл мұнда құтқару бекеті іске қосылып, демалыс орындары қалпына келтірілді.
Алдағы уақытта ауданның әлеуметтік-экономикалық дамуын қамтамасыз ету және тұрғындарды толғандыратын мәселелерді жүйелі түрде шешу бағытындағы жұмыстар жалғасады.
