Кездесуге «Жастар Рухы» жастар қанаты Абай облыстық филиалының төрағасы Темірлан Бақтияров пен Alikhan Bokeikhan University «Әлеуметтік-гуманитарлық ғылымдар» кафедрасының меңгерушісі, тарих ғылымдарының кандидаты, саясаттанушы Аман Рахметуллин қатысты.
Аман Рахметуллин Жолдауда көтерілген инфрақұрылымдық жаңғыру мен құқықтық реформалардың маңызына тоқталды. Оның айтуынша, жаңа Азаматтық кодексті әзірлеу және қалалардың цифрлық моделін қалыптастыру мемлекеттік басқарудың тиімділігін арттыруға мүмкіндік береді.
Саясаттанушының пікірінше, инфрақұрылымды цифрлық технологиялар арқылы басқару ресурстарды тиімді жоспарлауға жол ашады. Ал заңнаманы жаңарту азаматтар мен бизнес үшін түсінікті әрі тұрақты құқықтық орта қалыптастыруға ықпал етеді.
Өз кезегінде Темірлан Бақтияров жастардың қоғамдық бастамаларға қатысуы мен азаматтық жауапкершілігін арттырудың маңызын атап өтті. Ол «Таза Қазақстан» тұжырымдамасының мәніне тоқталып, қоршаған ортаға жанашырлықпен қарау әр азаматтың күнделікті әрекетінен басталатынын айтты.
Сонымен қатар ол жастардың экологиялық мәдениеті мен қоғамдық белсенділігін арттыруға бағытталған ROAD эстафетасы туралы сөз қозғады. Оның айтуынша, мұндай бастамалар жастарды ортақ іске жұмылдырып, елге деген жанашырлықты нақты іспен көрсетуге мүмкіндік береді.
Жиында Жолдаудағы әлеуметтік бастамалар да назардан тыс қалмады. Атап айтқанда, 2027 жылғы 1 қаңтардан бастап ең төменгі жалақыны 85 мың теңгеден 100 мың теңгеге дейін көтеру жоспарланған. Бұл өзгеріс 1,8 миллион адамның табысын арттыруға бағытталған.
Кездесу барысында студенттер құрылыс пен инфрақұрылымды дамыту, халықтың табысын арттыру, цифрлық технологияларды енгізу және экологиялық мәдениетті нығайту мәселелерін талқылады. Ашық диалог жастарға ел дамуының басым бағыттары жөнінде пікір білдіріп, өздерін толғандырған сұрақтарын сарапшыларға қоюға мүмкіндік берді.
«Әділет» партиясы Абай облыстық филиалының баспасөз қызметі.
