Биылғы жылы әлем елдері спортпен тыныстайды десек, артық болмас. Алда төрткүл дүние көз тіккен екі дүбірлі дода тұр. Алдымен Ресейде қысқы спорт түрлерінің төрт жылдықтағы ең басты аламаны — Сочи олимпиадасының алауы тұтанса, жазда жанкүйер қауым Бразилиядағы ала доптың додасына бәс тігеді.
Бразилияға біздің елдің аяқ допшылары бармайды. Бара қалған күннің өзінде жанкүйер қауым қатарында. Ал, Сочиден қазақстандықтардың күтері көп. Әсіресе, семейліктердің. Биылғы жылдың байрақты бәсекесіне біздің қаладан үш бірдей спортшы аттанады. Әлбетте, мақтанарлық мәртебе емес пе? Ақ олимпиадада Қазақстанның намысын қорғайтын биатлоншы қыз Галина Вишневская болса, шаңғымен «шаң қаптыратын» Виктория Ланчакова мен Ердос Ахмадиев.
{jcomments on}Бұйыртса, Қазақстанның көк байрағын біздің Ердос Ахмадиев алып жүреді. Басшылықтың шешімі осылай. Тәжірибесі қалыптасып, талай сыннан сүрінбей өткен Ердосқа аса жауапты міндет жүктеліп отыр. Білгенге байрақты алып жүру мақтан емес, жауапкершілік екендігін бағамдайтын болсақ, Ердостың жауапкершілігі екі есеге ұлғаятыны сөзсіз.
Уақытқа тоқтам бар ма. Олимпиада да алаулатып өтер. Жаңа рекордтар тіркеліп, жаңа есімдер жарыққа шығар. Әркімнің жүре-гінде әсер қалар. Сосын тарихқа жол тартады. Ал, осы Сочи олимпиадасының Қазақстан атты тарауында Ердостың да есімі айрықша аталып, тарихқа «ту ұстаған» тұлға болып енер.
Шаңғышының осы күнге, осы биік-ке немесе дәрежеге өзі немесе өздігінен жетпегені анық. Бақытына орай бапкер жолықты. Ол бапкердің есімі – Вячеслав Байәділов. Ердос 2002 жылы М. Әуезов атындағы педагогикалық колледжде оқуға түскеннен кейін шаңғымен айналысуға бет бұрыпты. Бозбаланың бағына Вячеслав бапкер болып жолықты. Міне, осы кезден бастап шәкірт пен ұстаздың арасында жылы қарым – қатынас орнады. Ортақ мақсат «жеңіс» деген жігерлі ұғымға жетеледі.
Вячеслав Байәділовтің жаттықтырушы деген жауапты мамандықтың тізгінін қаққанына да қырық үш жылдың жүзі болыпты. Жетпісінші жылдардың басынан осы күнге дейін шаңғыға бейімі барлардан шәкірт тәрбиелеп келеді. Еңбегі еленіп, Қазақстан Республикасының еңбек сіңірген жаттықтырушысы деген атағын да алды. Алдынан талай шәкірт тәлім алып, түрлі жарыстарда бапкерінің мәртебесін өсірді. Әлбетте, бапкердің биігі оза шапқан шәкіртімен айқындалады. Бапкердің алдынан осы күнге дейін оншақты спорт шеберлері тәлім алды.
-2010 жылы Ванкуверде өткен ақ олимпиадада ту ұстап шыққан биатлоншы Диас Кенешов те менің шәкіртім. Төрт мәрте олимпиада жолдамасын алған Оксана Яцкаяның жеке бапкері Қаникамал Дүйсенова да біраз жылдар бұрын менен тәлім алған. Қаникамалдың өзі де қазір ҚР еңбек сіңірген жаттықтырушы. Міне, Тәуелсіз Қазақстанның, оның ішінде Семейдің қысқы спорт түрінің менің өмірімде өлшеусіз ізі бар. Ал, Ердос болса, соңғы төрт жыл көлемінде Қазақстан ұлттық құрамасының қатарында. Әлем чемпионаты мен әлем кубогына қатысты. Елішілік жарыстардан да ешқашан тыс қалған емес, — дейді бапкер бізбен сұхбат барысында.
Вячеслав Байәділов Семейдің қысқы спорт түрінің тарихы тереңде, бай екендігін атап өтті. Кеңес Одағы тұсында атағы аспандап тұрған талай спорт саңлақтары биіктен көрінген. Ал, қазір алдыңғы толқынның ізін жалғастырушы талантты жастарға Семей толы екендігін де бапкер өй бөлісуде тілге тиек етті.
-Семей қаласынан үш бірдей спортшының ақ олимпиадаға қатысуы үлкен жетістік және нәтиже. Мұнда бапкерлердің біліктілігі мен спортшылардың маңдай терінің еш кетпегенін көруге болады, — дейді Вячеслав Байәділов.
Айта кету керек, Сочи олимпиадасы ақпан айының 7-ші жұлдызында басталып, 29-на дейін жал-ғасатын болады. Қазақстан ұлттық құрамасы қатарында шамамен байрақты бәсекеге қырыққа жуық спортшы қатысады деп жоспарлап отыр.
Ерзат ЖАНАТҰЛЫ,
«Семей таңы»
