№ 4 нашар еститін балаларға арналған мектеп-интернатында дәстүрлі түрде «Ертегілер жиынтығы» атты қар қалашығының салтанатты ашылу рәсімі өтті. Іс-шараның мақсаты қыс мез-гілінде мүмкіндігі шектеулі балалардың демалыс кезеңін ұйымдастыру әрі оларға эстетикалық тәрбие беру болып табылады.
Қар қалашығының ашылуына қалалық әкімдіктің өкілдері, соғыс және еңбек ардагерлері, жергілікті тұрғындар мен оқушылардың ата-аналары қатысты. Аталмыш шара ел Тәуелсіздігінің 25 жылдығына орай ұйымдастырылып, «Тәуелсіз Қазақстан – бақытты балалық шақ» атты тақырып аясында өткізілді.
— Елбасының балаларға, келешек ұрпаққа деген қамқорлығы ерекше екені мәлім. Мемлекет басшысының қолдауымен елімізде жас ұрпақтың жарқын өмір сүруіне жан – жақты жағдай жасалып келеді. Биыл еліміздің егемендік алғанына 25 жыл. Сондықтан бүгінгі іс-шараны осы мерейлі мезетке арнауды жөн санадық. Айта кету керек, қар мүсіндерін шәкірттерге жасату арқылы оларды әсемдікке, сұлулыққа баулуды мақсат еттік, — дейді № 4 нашар еститін балаларға арналған мектеп-интернатының директоры Мұрат Шақабаев.
Мектеп-интернаттың оқытушылары мен тәрбиеленушілері бірнеше мәрте «Ең үздік қар қалашығы» атты облыстық байқауда топ жарып, бас жүлдені иеленіпті. Үстіміздегі жылы да аталмыш сынға қатысқан интернат ұжымы жеңіс тұғырынан көрінуге үмітті. Қалашық аумағында 20-ға жуық түрлі мүсін тұрғызылыпты. Олардың биіктігі 1,7-ден бастап 3 метрге дейін жетеді. Қиял-ғажайып ертегі кейіпкерлерін қардан қалап жасаған оқушылардың бірі — Жас-тілек Ғарифолла.
— Қыс мезгілінің мен үшін орны бөлек. Бұл уақыт мамықтай жұмсақ, кіршіксіз таза әрі көңілдей аппақ қарымен көрікті болып келеді. Тек осы кезде ғана жаныма жақын спорт түрлерімен айналысудың сәті түседі. Атап айтқанда, достарыммен коньки теуіп, хоккей ойнағанды ұнатамын. Бұдан бөлек мектепте қардан мүсін жасаймыз. Қаладағы өзге де оқушыларды уақыттарын тиімді пайдаланып, осындай мүсіндерді жасауды үйренуге шақырамын, — дейді мектеп-интернаттың 8 сынып оқушысы Жастілек Ғарифолла.
Жақсылық
МҰРАТҚАЛИҰЛЫ,
«Семей таңы»
