Ұлттық өнерден қол үзбей ғасырдан-ғасырға жалғастыру — ұрпақ сабақтастығы. Соның бір дәлеліндей, сәулетімен қатар, рухани жағынан да өрісін кеңейтіп келе жатқан Семей шаһарында «мақсұтым – тіл ұстартып, өнер шашпақ» деп талпынған ұл мен қызға арналған Абай өнер мектебінің ашылу рәсімі өткен сәрсенбінің сәтінде болды.
Алғашқы сөзді Абай қорық-мұражайының директоры Болат Жүнісбеков алып, ақын оқыған Ахмет-Риза мешіт-медресесінің жанынан ашылып отырған өнер мектебі жастардың білімді, өнерлі болып өсуіне ықпал етіп, олардың ақын шығармашылығына деген қызығушылығын арттыру арқылы «сегіз қырлы, бір сырлы» ұрпақ тәрбиелеу мақсатында қолға алынып отырғанын жеткізді.
— Қасиетті қазақ жеріне, оның ішіне Абайдың топырағына қадам басқан әрбір қазақтың жүрегінде Абай Құнанбайұлының рухы, айтып кеткен өсиеттері мен ұлағатты сөздері тұратыны белгілі. Абай өз елінің — қазақтың бақытын өнерден, білімнен, адал еңбектен көрді. Қазірде біздің Қазақстанымызда адал еңбекті өркендетуге, еңбектің беделін көтеруге, жастарымызды өнер мен білімге тәрбиелеуге болуына ерекше мән берілуде. Осы ұлағаттың барлығы Абайдың жауһар поэзиясында, Абайдың қазыналы қара сөздерінде толықтай қамтылған. Бүгін сол Абай аманатына, музей ұжымы жас ұрпақты тәрбиелеуге аз болса да үлес қосайық деген ниетпен Абай өнер мектебін ашып отыр, — деді Абай қорық-мұражайының директоры Болат Жүнісбеков.
Бұдан кейін республикалық «Абай» қорының президенті Отантай Кәріпжанов пен елімізге белгілі ғалым Арап Еспенбетовке өнер мектебінің ашылу салтанатында лента қию рәсіміне қатысу құрметі берілді. Ал «Айша бибі» ұлттық мәдени орталығының жетекшісі, ақ жаулықты ана Айман Боқбасарова ақ ниетпен шашу шашты.
Абайдың қорық-мұражайында осыған дейін де ақындық өнер мектебі мен мәнерлеп оқу үйірмелері жұмыс жасап келді. Екі жылдан астам уақыт қос үйірменің жұмысын музей қызметкерлері өздері жүргізген. Енді арнайы мектеп қабырғасында бес бағыт бойынша жұмыстар атқарылмақ. Яғни жоғарыда аталған екі бағытқа қосымша көркемсурет үйірмесі, тоғызқұмалақ және дойбы үйірмесі мен қолөнер үйірмесі қосылып отыр. Өнер мектебі, негізінен, мектеп қабырғасында оқитын 6 — 11 сынып аралығындағы оқушыларды қабылдайды. Ал егер бір мектепте білім алатындардан ниет білдіргендер көп болса, онда музей қызметкерлері арнайы оқу орындарына келіп сабақтар жүргізбек.
— Биыл, өздеріңіз білесіздер, Қазақстан Тәуелсіздігіне 25 жыл толады. Ширек ғасыр, аз уақыт емес, әрине. Бұл Ұлы Дала елінің әуелден қалыптасқан мықты дәстүрлері бар. Қай жағынан қарасаңыз да, халқымыз өнерлі, әрі онысымен дүниежүзіне танылған. Сонымен қатар қазақ жеріне қадам басқан әрбір адам Абайдың ұлағатына көңіл бөлмей тұра алмайды. Абай жауһар поэзиясы немесе қазыналы қара сөздерінде халқымыздың бақыты алдымен өнерде, білімде, адал еңбекте екендігін айтқан. Абай музейінің мақсаты- жас ұрпақ тәрбиесіне аз да болса үлес қосу. Ең бастысы, өнерлі жас ұрпақты тәрбиелеуге атсалыссақ деген ниет еді. Абай өнер мектебінің мүшесі болам деп тілек білдіруші талапкерлерге есігіміз ашық», — дейді Абай қорық-мұражайының директоры Болат Жүнісбеков.
Асан САМАТҰЛЫ,
«Семей таңы»
