Зайсан ауданының әкімі Алмас Аманқолұлы Оңдақанов тұрғындар алдындағы алғашқы есепті кездесуін биыл Қаратал ауылдық округінен бастады. Жиналған қауым алдында ең алдымен Қаратал ауылдық округінің әкімі Талғат Дюсембаев өткен жылғы атқарылған жұмыстар туралы есепті баяндама жасады. Шешімін тапқан мәселелерді сарапқа салып, алда тұрған міндеттерге тоқталды. Осыдан кейінгі сөз кезегін жиынды ашып, жүргізіп отырған аудан әкімі Алмас Аманқолұлы алып, есепті мерзім ішіндегі ауданның әлеуметтік—экономикалық даму көрсеткіштері жайлы айтып өтті.
Ауданның әрбір саласы бойынша ілгерілеу басым. Жетістікті істер көп. Өткен 2015 жылы жоспарланып, нәтижелі жүзеге асырылған игілікті шаралар жайында дәйекті мысалдар келтіріп өткен өңір басшысы алдағы уақыттың еншісінде тұрған міндеттерді ортаға салды.
Ауданның негізгі саласы ауыл шаруашылығын дамытып, нығайту мақсатында іске асырылып жатқан оңды істер қатарын мемлекеттік бағдарламалардың жемісті түрде орындалуы, «Жұмыспен қамтудың жол картасы — 2020» бағдарламасы бойынша жалғасын тапқан жарқын істер құрайды.
Алмас Аманқолұлы есепті баяндамасында өңірдің табиғи байлығы – көгілдір отынды кәдеге жарату ісіндегі нақтылы атқарылған шаруалар жайында да мол мағлұмат берді. Соңғы екі жылдың ішінде аудандағы тоғыз елдімекенге газ құбырларын тарту жұмыстары толығымен атқарылса, ендігі кезекте көгілдір отынды аталған ауылдардың тұрғындары өз үйлерінде пайдалануға қол жеткізбек.
Тоғыз жолдың торабында орналасқан Қаратал ауылдық округі бес елдімекенді қамтиды. Тағы бір ерекшелігі — осы округтің аумағында екі мемлекеттің арасындағы қарым – қатынастың тікелей алтын көпірі «Майқапшағай» кеден бекеті орналасқан.
Округтегі халық саны 4508 адам, мемлекеттік және әлеуметтік нысандарда 174, шағын және орта бизнесте 84 адам еңбек етсе, 118 шаруа қожалығы, 58 жеке кәсіпкер тіркеуге алынған. Өзін-өзі жұмыспен қамтушылар саны 1571, аз қамтылған отбасылар саны 47. Округ бойынша өткен жылдың қорытынды көрсеткішінде мал басы өз төлі есебінен көбейген екен. Сол секілді өткен жылы егістік көлемі бес пайызға ұлғайтылып, әсіресе дәнді дақылдар мен картоп, көкөніс және бақша дақылдарының үлес салмағы артыпты. Диқандық кәсіпте тер төгіп еңбек еткен зайсандықтар мемлекет тарапынан берілетін субсидияға ие болып, өз шаруашылықтарын өркендету ісінде межелі көрсеткіштерге қол жеткізіпті.
Жалпы, өңірде тұрғындарды сапалы ауыз сумен қамтамасыз ету ісі жүйелі жолға қойылған. Мәселен, аталған округке қарасты Үлкен Қаратал ауылының тұрғындары 2014 жылы осындай жетістікке қол жеткізсе, ендігі кезекте Қаратал ауылына су құбырларын тарту ісі бойынша жобалық құжаттар дайындалып, жоспарға кіргізілген. Аудан халқының салауатты өмір салтын қалыптастырып, бос уақыттарында спорт түрлерімен айналысуына, денсаулығын жақсартып, нығайтуға мол мүмкіндіктер қарастырылуда. Оған дәлел — өткен жылы Қаратал ауылдық округінің орталығында жаңадан спорт модулі салынып, пайдалануға берілсе, биылғы жылы мұндай спорт модулін Үлкен Қаратал ауылында салу жоспарда тұр. Былтырғы жылы Айнабұлақ, Сарытерек ауылдарында қажетті құрал-жабдықтармен қамтылған жаңа емхана нысандарының құрылысы аяқталып, пайдалануға берілсе, Дайыр ауылында жаңа мәдениет үйі салынып, ауыл халқын толғандырған өзекті мәселе шешімін тапты. Зайсан қаласында жабық бассейн салынып, іске қосылды.
Ауданда білім саласы бойынша атқарылып жатқан игілікті істер мектеп қабыр-ғасындағы жеткіншектердің сапалы білім, саналы тәрбие алуына бағытталған. Былтыр Зайсан ауданында мектеп бітірген түлектер ҰБТ қорытындысы бойынша облыста бірінші орыннан көрінді. Сол секілді республикалық, облыстық пән олимпиадаларына қатысқан оқушылар жүлделі орындардан табылды.
Халықтың әлеуметтік жағдайын жақсарту, жұмыссыздықты азайту, тұрмысы төмен, аз қамтылған отбасыларды қолдау бойынша жоспарлы жұмыстар атқарылуда.
Жиында сөз алған еңбек ардагерлері Қ. Әдібаев, Р.Мұқанов, А.Жүнісов, Т.Жалбағаев, аудандық мәслихат депутаты Қ.Сайранов аудан әкімі мен ауылдық округ әкімінің есепті баяндамасы бойынша атқарылған жұмыстарға оң баға берді. Сонымен бірге ұсыныс, пікірлерін айтып, ойларымен бөлісті.
Есепті жиында тұрғындардың барлығы да округтің дамуы туралы сөз қозғады. Жол жөндеу, жаңа мектеп, балабақша құрылыстарын салу, «Майқапшағай» елдімекеніне ауыл мәртебесін беру жайлы, сондай-ақ жергілікті жердегі құрылысқа қажетті құм, қиыршық тас сынды өнімдерді тиісті орындардан алу заңдылығы жайында айтылды.
А. ДӘУЛЕТ, Зайсан ауданы.
