Қалалық Достық үйінде Ауған соғысына қатысқан ардагерлер шаһардағы жастар ұйымдары өкілдерімен кездесті. Шараның мақсаты өскелең ұрпаққа аға буынның ерлікке толы өнегелі өмірін дәріптеу, олардың бойында отансүйгіштік қасиет қалыптастыру болатын.
Кездесуге интернационалист-жауынгерлер, қалалық ішкі саясат бөлімі басшысының орынбасары Нұржан Есенжолов, қалалық мәслихаттың депутаты Ерлан Кеңесбаев және жастар ұйымдарының бірқатар белсенділері қатысты.
Ол күндер бүгінде тарихқа айналды. 1979-1989 жылдар аралығында Ауған жерінде тар жол тайғақ кешкен ардагерлер еркін сұхбат барысында жастарға бүгінгі бейбіт өмірдің қаншалықты қымбат екенін айтты. Бұған қоса кешегі жауынгерлер жиналған қауымға жаңадан жарық көрген естелік кітапты таныстырды. Бұл еңбекте 1979 — 1989 жылдарда Ауғанстан жерінде шейіт болған шығысқазақстандықтардың есімдері жинақталған екен. Аталмыш туынды облыстық және Семей Ауған соғысы ардагерлері кеңесінің бастамашы болуымен жарыққа шығыпты.
— Биыл ел Тәуелсіздігіне 25 жыл. Осы кезеңде мемлекетіміз талай сындарлы сәттерді басынан өткерді. Алайда Елбасымыздың сарабдал саясаты мен қайраткерлігінің арқасында Қазақстан түрлі сындардан мүдірмей шыға білді. Ауған соғысы ардагерлері де еліміздің қарыштап дамуына өзіндік үлестерін қосуда. Бүгінде біздің кеңес қаланың қоғамдық-саяси өміріне белсенді араласып келеді. Өздеріңіз білетіндей, шаһардағы медицина университетіне қарсы интернационалист-жауынгерлерге арнал-ған ескерткіш тұрғызылған болатын. Қазір ол аумақ қалалықтардың жиі серуендеп демалатын сүйікті орындарының біріне айналды. Алайда біз оны соғыста қайсарлықпен қаза тапқан сарбаздарға тағзым етіп, оларға құрмет көрсету үшін орнатқан едік. Сондықтан да, құрметті жастар, «Жаным — арымның садағасы» деп, Отан үшін жанын құрбан еткен ағаларыңызды естен шығармаңыздар. Мына бейбіт күнді қадірлеп, қастерлей біліңіздер. Қару үні мүлдем естілмесін. Қай жерде жүрсек те, тілейтініміз бір – соғыс болмасын, — деді Ауған соғысының ардагері Серікбосын Бейсенбаев.
Сондай-ақ интернационалист — жауынгерлер шаһардың жас тұрғындарын өздерінің азаматтық құқығын пайдалана отыра алдағы сайлауға бір кісідей қатысуға шақырды. Өз кезегінде жастар бірлестіктерінің белсенділері көпті көрген аға буынға өздерін қызықтырған сауалдарын жолдап, өнегелі сұхбаттары үшін алғыстарын білдірді. Кездесу соңы шағын концерттік бағдарламамен жалғасын тапты.
Жақсылық СҮЛЕЙМЕН,
«Семей таңы»
