Табиғаттың ескертпей келетін тылсым құбылыстарының бірі – көктемгі қызыл су тасқыны. Бұл апаттың алдын алу шаралары әсіресе қыстың соңын ала қауырт жүргізілетіні белгілі. Дер кезінде қарекет жасау, тұрғындар арасында сақтық шараларын жүргізу, азаматтық қорғанысты нығайту көктемгі су басу қаупін сейілтіп, адам және мүлік шығынына жол бермейді. Міне, осы тәрізді бірқатар мәселелер барысы жуырда Семей қалалық төтенше жағдайлар басқармасында өткен баспасөз мәслихатында айтылды.
Семей қалалық төтенше жағдайлар басқармасының азаматтық қорғаныс басшысы Марат Дәулетиннің айтуынша, қазіргі күні Ертіс өзеніндегі мұздың қалыңдығы 36 сантиметрді құрайды. Ал бүгінгі таңдағы түскен қардың көлемі жылдық нормадан аспайды. Яғни, осылардың барлығын есепке алғанда, алаңдауға негіз жоқ. Әйтсе де сақтық қашанда қажет. Бұл ретте көктемгі су тасқынының алдын алу шаралары межеленген жоспар бойынша жүргізіліп жатыр. Қалалық әкімдік пен облыс әкімдігі тарапынан әлі толық бекітіле қоймағанмен, апаттың алдын алуға барлық алғышарттар бар. Жалпы, қазіргі күні күн жылып, қар көбесі сөгіле қойған жоқ. Әйтсе де семейлік төтеншеліктер биыл жылдағыдан ертерек кірісті.
Өткен жылы Ертіс өзеніндегі су деңгейі көтеріліп, бірқатар елдімекенге қауіп туғызған болатын. Басқарма басшысы бұл жайына да тоқталып өтті. Биылғы жылы сақтық шаралары жүргізіліп жатыр. Бұл ретте Шығыс кентінің Ертіс өзені жағалауына таяу орналасқан бірқатар көшелері тұрғындарына ескерту қағаздары тапсырылды. Арнайы қаражат бөлінген. Су жолын бөгеуге арналған құм толтырылған қаптар да даярланған. Іс-әрекет жоспары әзірленген. Сонымен қатар қала көшелерінен қар шығару жұмыстары да үздіксіз жүргізілуде. Қорыта айтқанда, барлық қатердің алдын алуға даярлық жоғары.
Осы ретте басқарма басшысы қала тұрғындарының кейбір ескерту жұмыстарына немқұрайлықпен қарайтынын, соның салдарынан өмірлеріне қауіп туатын жайттар да кездесетінін жеткізді. Мәселен, өткен жылы ыс тиіп уланған 120 жағдай болса, биыл жыл басынан бері 15 жағдай орын алған. Алайда жыл басталған осы бір айдан аса уақыт ішінде үш адам бақилық болыпты. Түтін ысына тұншыққан жанұялардың біріне төтеншелік қызметкерлер таңертеңгісін ғана үйлеріне барып ескерту жасап кеткен екен. Алайда ол нәтиже бермеген.
— Қаламызда 25 мыңнан аса пешпен жылытылатын жеке тұрғын үй бар. Олардың барлығына жекелей есіктерін қағып ескертіп шығу мүмкін емес. Сол тәрізді қарлы боран туралы ескертуге қарамастан жолға шығып кетіп, бізді көмекке шақыратын жағдайлар да орын алады, — деді Марат Дәулетин өз сөзінде.
Жиын барысында БАҚ өкілдері тарапынан бірқатар сауалдар қойылып, тақырып аясында тұшымды жауаптар алынды.
Қ.ӘЛІМБЕК,
Семей қаласы.