Биыл Кеңес әскерінің Ауғанстаннан шығарылғанына 27 жыл. Ресми мәліметтерге сүйенсек, бұрынғы Семей облысынан Ауған жеріне интернационалдық борышын өтеуге 1 100 сарбаз аттанған екен. Жауынгерлік міндеті мен борышын өтеу кезінде 46 сарбаз қаза тапса, 2 сарбаз хабар-ошарсыз кеткен. Бұл жайында Семей қаласы қорғаныс істері жөніндегі басқармасында атаулы күнге орай ұйымдастырылған іс-шарада айтылды.
Ұымдастырылған шараның мақсаты 1979 — 1989 жылдар аралығында Ауған жерінде интернационалдық борышын өтеу кезінде қаза тапқан жауынгерлердің рухына тағзым ету, аға буынның ерліктері арқылы өскелең ұрпақты отансүйгіштік рухта тәрбиелеу болып табылды. Жиынды өткізуге қалалық Ауған соғысы ардагерлерінің кеңесі және Семей қаласы қорғаныс істері жөніндегі басқармасы ұйытқы болған. Бүгінде ортамызда жүрген интернационалист – жауынгерлер қаланың қоғамдық — саяси өміріне белсене араласып, жастардың бойында патриоттық сана — сезімді қалыптастыруда өзіндік үлестерін қосып келеді.
— Біз қаза тапқан қарулас жолдастарымыздың ата — аналарымен тығыз қарым -қатынастамыз. Қандай шаралар болсын әрдайым ол кісілер жанымыздан табылады. Олардың көпшілігі егде жастағы қариялар. Бүгінгі күні Ауған соғысы ардагерлерінің басым бөлігі елуді еңсеріп, алпысты алқымдап қалған ел ағалары. Жас жеткіншектерге тәлім — тәрбие беруде олар өз ақыл — кеңестерімен бөлісіп келеді. Саяси және мәдени әрі спорттық шаралардан тыс қалмайды. Осы Кеңес әскерінің Ауған жерінен шығарылғанына 27 жыл толуына байланысты қаламызда үлкен шаралар өткізу жоспарлануда. Мұндай кездесулер жиі болып тұруы қажет,- дейді Ауған соғысы ардагерлері мен мүгедектерінің қоғамдық бірлестігінің төрағасы Боранбай Бегатов.
Сонымен қатар Боранбай Оразбайұлы Семейдегі әр мектепте интернационалист-жауынгерлерге арналған бұрыштардың ашылғанын, қаладағы бірқатар көшеге жауынгерлер есімдері берілгенін айтап өтті. Кездесуде интернационалист – жауынгерлер бүгінгі бейбіт күннің маңыздылығын ерекше атап өтті.
Жақсылық МҰРАТҚАЛИҰЛЫ,
«Семей таңы»
