Ел ордасы Астанадан шыққан «Мәңгілік Ел» пойызы өткен аптаның жұмасында ұлылар еліне келіп жеткен еді. Ақтоғай, Шар, Защита станцияларында болып, халықпен жүздескен патриоттық акция қатысушылары мінген пойызды семейліктер темір жол вокзалы басынан сән-салтанатпен қарсы алды.
Бұл күні темір жол бекетінің басы әдетте-гіден тыс абыр-сабырға бөленген еді. «Мәңгілік Ел» пойызы станция басына ұзын-сонар гудок дауысымен жетті. Ал бұл жерде мәртебелі меймандарды салтанатты марш ойнаған оркестрмен жергілікті атқарушы билік өкілдері, теміржолшылар, зиялы қауым қарсы алды. Әжелер шашу шашты.
Қонақтарды құрметпен қарсы алған қала әкімінің орынбасары Надежда Шарова алғашқы болып сөз алып, ілтипатты пікір білдіріп өтті.
— Құрметті қала қонақтары, қадірлі жерлестер! Бүгін біз «Мәңгілік Ел» пойызын Семейде қуана қарсы алып отырмыз. Мәртебелі меймандар, Абай мен Шәкәрімнің, Мұхтардың еліне қош келдіңіздер! Нұрлы жолды бағдар етіп, Мәңгілік Елдің іргесін қалауда мұндай патриоттық шараның берері мол,- деп ізгі лебізін білдірді.
Көпшілік алдында «Мәңгілік Ел» пойызының штаб жетекшісі, танымал қоғам қайраткері, тарихшы, жазушы, Л. Гумилев атындағы Еуразия ұлттық университетінің профессоры Әміржан Әлпейісов сөз алып, еліміздегі татулық пен бірлікті ту еткен патриоттық акцияға қатысушылар атынан семейлік жұртшылыққа ыстық ықыласы үшін алғыс білдірді. Сонымен қатар осынау пойызбен келген 98 адам бір күн бойы қалада болып, зиялы қауым өкілдерімен, жастармен жүздесетінін, ал дәрігерлер, құқық саласының қызметкерлері мен министрлік өкілдері жұртшылыққа тегін кеңес беретінін жеткізді.
— Биылғы ел Тәуелсіздігінің 25 жылдығы аясында Елбасының «Мәңгілік Ел» ұлттық идеясын ту етіп осынау патриоттық акцияны ұйымдастыруда бірнеше мақсат көзделді. Соның бірі жер-жерлерде жұртшылықпен тығыз байланыс орнатып, қоғамды біріктіруші, береке-бірлікті нығайтатын шараларды жандандыру болатын. Бүгін Семейге ат басын тіреп отырмыз. Ұлылар еліне үлкен толқыныспен аяқ бастық. Сіздерге Астананың ыстық сәлемін әкелдік. Келудегі мақсатымыз — биылғы жылдың тарихи жыл екендігін паш ету,- деп атап өтті Әміржан Қайырбекұлы.
Ал өз кезегінде семейлік теміржолшылар атынан пікір білдірген Семей магистральдық желі бөлімшесінің басшысы Талғат Еспанов аталмыш пойыздан түскен меймандарға алғыс білдіріп өтті.
– Сіздердің бұл келген қадамдарыңызға халықтың ықыласы ерекше жоғары. «Мәңгілік Ел» пойызы біздің ортақ Отанымыздың тұғырын биіктетуге шақырады деп білеміз. Және байтақ еліміздің абыройын арттыру жолында барша семейліктер талмай үлес қосатын боламыз,- деп лебіз білдірді.
Осыдан соң шаһар қонақтары қаладағы іргелі оқу орындары мен Достық үйінде болды. Дөңгелек үстелдер мен семинар — кездесулер өткізілді. Облыстық Абай кітапханасында «Тәуелсіздік тарихы – ұлт рухының өлшемі» тақырыбында қоғам қайраткерлері лекция оқыды. Ал №6 емханаға келген дәрігерлер қала халқы үшін тегін түрде медициналық тексерулер өткізіп, кеңестер берді.
«Мәңгілік Ел» пойызымен келген қонақтардың Семей қаласындағы бір күндік сапары жайлы газетіміздің келесі санынан оқи аласыздар.
Қуаныш ЖОЛЫМБЕТ,
«Семей таңы»
